Teńiz-Qorǵaljyn kólder júıesi sýynyń quramy synaptan tolyq tazardy - T.Kerteshev
ASTANA. Aqpannyń 2-si. QazAqparat /Marlan Jıembaı/ - Teńiz-Qorǵaljyn kólder júıesi sýynyń quramy synaptan tolyq tazarǵan.
Bul pikirdi búgin elordada Dúnıejúzilik sýly-sazdy aýmaqtar kúnine oraı ashylǵan fotokórme barysynda BUU Damý baǵdarlamasy men Qazaqstan Respýblıkasy Úkimetiniń sýly-sazdy aýmaqtardy korǵaý jobasynyń ulttyq menedjeri Talǵat Kerteshev bildirdi.
Elimizdegi barlyq kólderdiń sapasy kelip quıatyn ózen sýlarynyń sapasyna tikeleı baılanysty. Teńiz-Qorǵaljyn kólder júıesine kelip quıylatyn eń iri ózen sýlarynyń biri Nuraǵa tıesili. Al ol Temirtaý qalasynyń tusynan aǵyp ótetindikten, synappen zaqymdalǵan bolatyn. «Bul jerlerde kezinde iri metallýrgııalyq ónerkásip oshaqtary boldy. Osy kásiporyndar ózderinen shyǵatyn qaldyqtardy sýǵa jaqyn kómetin. Sonyń saldarynan qaldyqtar jer sýlary arqyly Nura ózenine qosylǵan edi», deıdi ol.
Al Nura ózeniniń lastanǵan sýy 100-120 shaqyrymnan keıin Teńiz-Qorǵaljyn kólderine baryp quıatyndyǵyn aıtqan ol «sý quramy lastanǵannan keıin balyqtar bolmaıdy, balyq bolmasa qustar bolmaıdy. Osylaısha ózara tyǵyz baılanys, tabıǵı tepe-teńdik buzylady», dedi óz sózinde.
Onyń aıtýynsha, qazirgi ýaqytta Dúnıejizilik bank pen elimizdiń Sý resýrstary komıteti birlesip, Nura ózenin synaptan tazartý jumystaryn júrgizip jatyr. Atalǵan joba aýqymynda Temirtaý qalasynan tómenirek ornalasqan jalpy kólemi 50 shaqyrymdyq polıgonnyń topyraǵyn qazyp alyp, ózen arnasynan alshaqtatý jumystary júrgizilýde. «Bul óte kerekti sharýa. Sebebi Teńiz-Qorǵaljyn kólder júıesi júrgizilgen sońǵy saraptama sý quramy synaptan tolyq tazarǵandyǵyn kórsetti. Synap bolǵannyń ózinde de múmkindi shekten aspaıdy», deıdi T.Kerteshev.
