Teńiz kóligi kásipkerleri qaýymdastyǵy «QR teńiz tasymalyndaǵy kókeıtesti máseleler» taqyrybynda dóńgelek ústel ótkizdi
Atalǵan qaýymdastyqtyń atqarýshy dırektory Baýyrjan Shalabekovtiń aıtýynsha, alqaly jıynǵa qatysýshylar otandyq teńiz kóliginiń ózekti máselelerin, atap aıtqanda, Qazaqstandaǵy teńiz saýda jolyn retteýdiń negizgi sıpattary, elimizdegi teńiz kóliginiń qazirgi zamanǵy damýy, Qazaqstan úshin teńiz kóligin damytýdyń mańyzy, teńiz kóligi qyzmetin retteıtin zańnamany jetildirý sııaqty máselelerdi qozǵaǵan.
«Bul sharanyń negizgi maqsaty - Qazaqstan ekonomıkasynyń jyldam damyp kele jatqan salasy retinde teńiz kóliginiń qazirgi jaǵdaıy men bolashaǵynyń damýyn talqylaý boldy», deıdi ol.
Onyń sózine qaraǵanda, qazir qazaqstandyq munaıdyń 15 paıyzy teńiz jolymen tasymaldanady, 2020 jyly bul kórsetkish 40 paıyzdan asyp túsýi múmkin. Teńiz flotynyń 200 birligi Kaspııdiń qazaqstandyq sektoryn ıgerýge jumyldyrylǵan. Elimizde bolashaqta teńiz floty kemeleriniń sany eki eseden astamǵa artpaq.
Jıynǵa qatysýshylar qazaqstandyq flotty damytý mańyzdy strategııalyq maqsat ekenin atap ótip, teńiz kóligin retteıtin ulttyq zańdylyqty ári qaraı jetildirý, elimiz Halyqaralyq teńiz uıymynyń múshesi bolǵandyqtan, onyń talaptary men konventsııalaryn oryndaý, teńiz kemesi salasyndaǵy QR zańnamasyn halyqaralyq talaptarǵa sáıkes retteý, Qazaqstanda teńiz máseleleri boıynsha bilim berý júıesin qurý, sonymen qatar, otandyq teńiz kóliginiń damýyna kedergi keltiretin ózge de jaıttardy sheshý jóninde pikir almasyp, naqty usynystaryn ortaǵa saldy.
Dóńgelek ústel jumysyna QR Parlament Májilisi depýtattary, memlekettik organdar, shet elderdiń dıplomatııalyq mıssııalary ókilderi, teńiz kóligi salasyndaǵy belgili halyqaralyq sarapshylar, keme, kólik kompanııalarynyń ókilderi qatysty.
