Teńiz kenishiniń taǵy úsh jumysshysynan koronavırýs anyqtaldy
ATYRAÝ. QazAqparat – Atyraý oblysynda Teńiz kenishiniń taǵy úsh jumysshy Covid-19 vırýsyn juqtyrǵany anyqtaldy, dep habarlaıdy QazAqparat.
Búgin tótenshe jaǵdaı rejımin qamtamasyz etý jónindegi óńirlik jedel shtabtyń habarlaýynsha, 4 adamnan koronavırýs ınfektsııasynyń belgisi rastalǵan.
Naýqastardyń ekeýi 1989 jyly týǵan, bireýi 1969 jyly týǵan er adamdar. Olardyń barlyǵy – Teńiz kenishindegi merdiger mekemelerdiń jumysshylary. Buǵan deıin koronavırýs juqtyrǵan naýqaspen baılanysta bolǵany úshin jumysshylar karantındik statsıonarǵa jatqyzylyp, olardan zerthanalyq synamalar alynǵan bolatyn.
«Tórtinshi naýqas 1969 jylǵy áıel adam. Ol buǵan deıin qaýipti toptyń qatarynda bolǵan. Áıel adam josparly PTsR testileýden ótti. Nátıjesinde koronavırýs ınfektsııasy rastaldy. Osylaısha, Atyraýda vırýstyń jańa oshaǵy anyqtalyp otyr. Qazirgi ýaqytta naýqastardyń jaǵdaıy qanaǵattanarlyq. Bekitilgen hattamaǵa sáıkes tıisti em júrgizilýde. Naýqastarmen baılanysta bolǵan adamdar anyqtalyp, oqshaýlanýda. Aýrý oshaqtarynda zalalsyzdandyrý júrip jatyr» dep habarlady tótenshe jaǵdaı rejımin qamtamasyz etý jónindegi óńirlik jedel shtab.
Atyraý oblysynda 29 sáýir kúngi jaǵdaı boıynsha 135 adamnan koronavırýs ınfektsııasy rastalyp otyr.
