Teńiz kenishindegi óndiristi keńeıtý munaı óndirisin jylyna 12 mıllıon tonnaǵa arttyrýǵa múmkindik beredi - Saýat Myńbaev
ATYRAÝ. 21 sáýir. QazAqparat /Andreı Sokolov/ - Atyraý oblysynyń Teńiz kenishindegi munaı óndirisi jylyna 12 mıllıon tonnaǵa artýy múmkin. Atyraýda Teńiz kenishindegi munaı óndirisiniń bastalýynyń 20 jyldyǵyna arnalǵan jınalysta elimizdiń munaı jáne gaz mınıstri Saýat Myńbaev osyndaı málimdeme jasady.
«Kenishtiń mańyzy úlken. «Teńizshevroıl» búginde jylyna 26 mıllıon tonnadaı munaı óndirýde. Bul Qazaqstan boıynsha óndirilip jatqan barlyq munaıdyń úshten birine jeteqabyl. Biraq keleshek týraly aıtar bolsaq, munaı óndirisin arttyrýda Teńizdiń keleshegi kemel. Qazir kompanııanyń ishinde óndiristi keńeıtý jobasy qarastyrylýda. Bul joba jyldyq óndiriske taǵy 12 mıllıon tonna munaı qosýǵa múmkindik beredi», - dedi S.Myńbaev.
Teńiz kenishinde ónerkásiptik munaıdyń alǵash óndirile bastaýynyń 20 jyldyǵyna arnalǵan shara Qazaqstan Táýelsizdiginiń 20 jyldyǵyn toılaý sharalarynyń aıasynda ótip otyr.
Esterińizge sala keteıik, álemdegi eń tereń kenish sanalatyn Teńiz kenishinde alǵashqy munaı 1991 jyly óndirilgen bolatyn. Teńizdiń barlanǵan qory 3 mıllıard tonnany quraıdy, álemdik jiktelim boıynsha bul kórsetkish Teńizdi eń úlken kenishteriniń qataryna jatqyzýǵa múmkindik beredi. 1993 jyly Qazaqstan men amerıkandyq «Shevron» kompanııasynyń arasynda Teńizdi birlesip ıgerý týraly kelisimshart jasalyp, «Teńizshevroıl» JShS qurylǵan bolatyn. Jylyna 800 myń tonna munaı óndirýden bastaǵan kompanııanyń óndirisi birtindep 26 mıllıon tonnaǵa jetip otyr. «Teńizshevroıl» búginde Qazaqstandaǵy eń iri munaı óndirýshi kásiporyn.
