Teńiz kenishindegi karantın 12 maýsymǵa deıin sozylady

ATYRAÝ. QazAqparat - Atyraý oblysynyń Teńiz kenishindegi karantın merzimi 12 maýsymǵa deıin sozylatyn boldy, dep habarlaıdy QazAqparat.

Bul týraly oblystyq bas sanıtarlyq dáriger Temirbek Musaǵalıevtyń qaýlysynda aıtylǵan.

Qaýlyǵa sáıkes Teńiz kenishindegi karantın 29 mamyr saǵat 00:00-den 12 maýsym kúngi túngi saǵat 00:00-ge deıin sozylady. Osyǵan baılanysty munda kóliktiń kirip-shyǵýyn shekteý saqtalady.

Ken orny aýmaǵynda adamdardyń keshki saǵat 21:00-den tańǵy saǵat 5:00-ge deıingi aralyqta júrýi shektelgen. Polıtsııa qyzmetkerleri karantın sharasynyń saqtalýyn qadaǵalaý úshin vıdeokameramen qabataralyq, bólmearalyq qozǵalysty baqylaıdy.

Sondaı-aq, polıtseıler «Ońtústik Teńiz», «Jańa Teńiz», «Vaternas», «Majar qalashyǵy» sekildi vahtalyq kentterde karantınniń buzylmaýyn qadaǵalaýdy jalǵastyrady.

Buǵan deıin Teńiz ken ornyndaǵy jumystyń jalǵasatyn, sondaı-aq 27 mamyrda 25 kenshiniń qaýipti indetten jazylǵanyn habarlaǵan bolatynbyz.