Teńiz kenishindegi ınfektsııalyq statsıonarda 440 naýqas emdelip jatyr
ATYRAÝ. QazAqparat – «Qyzyl» aımaqtaǵy Atyraý oblysynyń ınfektsııalyq statsıonarlarynda 1 736 naýqas oqshaýlanǵan. Onyń ishinde 440 patsıent Teńiz kenishindegi statsıonarda emdelip jatyr, dep habarlaıdy QazAqparat.
Oblystyq densaýlyq saqtaý basqarmasy baspasóz qyzmetinen málim etkendeı, koronavırýs ınfektsııasyna shaldyqqan naýqastar sanynyń kóbeıýi Jylyoı aýdany men Teńiz kenishinde baıqalyp otyr.
«Atyraý oblysynda 5 tamyzda koronavırýs ınfektsııasyn juqtyrǵan 340 naýqas anyqtaldy. Onyń ishinde Atyraý qalasynda 230 adamnyń qaýipti vırýsqa shaldyqqany rastaldy. Al, Teńiz ken ornynda 28 jumysshydan indet belgisi anyqtaldy. Sondaı-aq, Jylyoı aýdanynda – 26, Qyzylqoǵada – 12, Inderde – 11, Isataıda – 11, Qurmanǵazyda – 11, Mahambette –6, Maqat aýdanynda 5 adamnan koronavırýs juqtyrdy» -dep habarlady basqarmanyń baspasóz qyzmeti.
Qazir 5 333 naýqas óz úıinde em qabyldap jatyr. Teńiz ken ornyndaǵy statsıonarda – 440, aýdandardaǵy statsıonarlarda – 410, №2 oblystyq aýrýhanada – 200, modýldik aýrýhanada – 195, temirjol aýrýhanasynda – 108, kardıologııalyq ortalyqta – 105, oblystyq aýrýhanada – 94, ftızıopýlmanologııa ortalyǵynda 76 naýqas emdelýde. Sondaı-aq, ınfektsııalyq statsıonarǵa aınalǵan jataqhanada 108 patsıent oqshaýlanǵan.
Eske sala ketelik, buǵan deıin Atyraý oblysynda koronavırýstan 7 myńǵa jýyq adam emdelip jatqanyn habarlaǵan bolatynbyz.
