Teńiz kenishindegi ınfektsııalyq statsıonarda 194 naýqas em alýda
ATYRAÝ. QazAqparat – Atyraý oblysynyń Teńiz kenishindegi ınfektsııalyq statsıonarda 194 naýqas em alyp jatyr, dep habarlaıdy QazAqparat.
«Teńizshevroıl» kompanııasynyń málimetinshe, ken ornyndaǵy qyzmetkerler arasynda qaýipti indetti juqtyrýdyń 3895 jaǵdaıy tirkelgen. Naýqastardyń 2863-i emdelip shyqqan.
«Test qorytyndysymen oń nátıje bergenderdiń negizgi bóligi vahtaǵa bara jatqan qyzmetkerler arasynda bolǵan. TShO qyzmetkerleri arasynda 370 jaǵdaı anyqtalǵan. Kún saıyn rastalatyn jaǵdaılardyń sany 90%-ǵa tómendedi.
Búgingi tańda Teńiz ken ornyndaǵy juqpaly aýrýlar statsıonarynda (oblystyq juqpaly aýrýlar aýrýhanasynyń fılıaly) 194 qyzmetker em alýda. Bul jalpy tósek-oryn sanynyń 27%-yn quraıdy» -delingen kompanııanyń aqparatynda.
Teńiz ken ornyndaǵy oń dınamıkaǵa, sondaı-aq, epıdemıologııalyq ahýaldyń jaqsarýy belgilerine qaramastan, karantındik shekteýler saqtalýda. Betperde taǵý, áleýmettik araqashyqtyqty saqtaý, ózin-ózi oqshaýlaý TShO-nyń jáne merdiger uıymdardyń barlyq qyzmetkeri úshin mindetti talap bolyp qalýda.
Eske sala ketelik, budan buryn Teńiz kenishinde vahtalyq jumys merzimi uzaratynyn habarlap edik.
