Teńiz kenishindegi ahýal turaqtalǵan soń jumysshylar jumysyna oralady - ákim
ATYRAÝ. QazAqparat – Teńiz kenishindegi jumys jalǵasyn tabady. Jaǵdaı turaqtalǵan kezde jumysshylar jumysyna oralady. Bul týraly onlaın brıfıngte Atyraý oblysynyń ákimi Mahambet Dosmuhambetov málim etti, dep habarlaıdy QazAqparat.
Jylyoı aýdanyndaǵy Teńiz kenishi indettiń oshaǵyna aınalǵan. Qazir munda dezınfektsııalyq jumystar júrgizilip jatyr.
«Ken ornynan jumysshylardy shyǵarýdaǵy maqsat – adamdardyń densaýlyǵy men qaýipsizdigin saqtaý. Sol arqyly qaýipti indettiń taralyp ketýine jol bermedik», - dedi oblys ákimi Mahambet Dosmuhambetov.
Ákimniń málimdeýinshe, Teńiz ken ornynan 18,5 myń jumysshy turǵylyqty mekenjaıyna shyǵarylǵan.
«Teńiz ken ornynda jumys toqtap, adamdar jumyssyz qalady degen másele týyndap otyrǵan joq. Kenishtegi jumys jalǵasyn tabady. Mundaǵy ahýal turaqtalǵan soń jumysshylar jumys ornyna oralady», - dedi oblys ákimi.
