Teńiz kenishinde koronavırýspen kúres qalaı júrip jatyr
Atalǵan ken ornyn ıgerip jatqan «Teńizshevroıl» JShS baspasóz qyzmetiniń málimetinshe, 7 jeltoqsanǵa deıin COVID-19 vırýsyn juqtyrǵandardyń jalpy sany 4532 adamdy quraǵan. Naýqastardyń 95%-y indetten emdelip shyqqan. Al, kompanııanyń óz qyzmetkerleriniń arasynda ınfektsııany juqtyrýdyń 423 jaǵdaıy anyqtalǵan. Ózge naýqastar merdiger kásiporyndardyń jumysshylary bolyp otyr.
«Búginge deıin 167 000-nan astam PTR synaǵyn ótkizgen kompanııa pandemııa kezindegi jumysty túrli baǵytta jetildirdi. PTR synaqty ótkizýge baılanysty, sondaı-aq ınfektsııanyń taralýynyń aldyn alýǵa qatysty sharalar jaqsartyldy. Teńizde júrgizilgen PTR synaqtar sany jan basyna shaqqanda Qazaqstannyń iri qalalaryndaǵy ortasha deńgeıden edáýir joǵary ekenin atap ótý mańyzdy.
Kompanııa COVID-19-ǵa qatysty jaǵdaıdy udaıy qadaǵalap otyr. Qys mezgilinde medıtsınalyq ınfraqurylymdy, materıaldardy jáne testileý múmkindikterin jetkilikti deńgeıde daıyndaý úshin Qazaqstan Respýblıkasynyń memlekettik organdarymen tyǵyz baılanysta jumys isteıdi. Teńiz ken ornyna ınfektsııa juqtyrýdyń jańa jaǵdaıyn engizýdi boldyrmaýǵa baǵyttalǵan qaýipsizdik sharalaryna, onyń ishinde operatıvti qyzmetkerlerdi turǵyn úılerde, kólikterde, jumys oryndarynda toptarǵa bólýge, sonymen qatar, jańa jaǵdaılardy anyqtaý, tıisti adamdardy, olardyń jaqyn nemese áleýetti baılanysta bolǵandaryn oqshaýlaý úshin PTR synaqtaryn barynsha kóbirek ótkizý jalǵasady» -dep habarlady kompanııanyń baspasóz qyzmetinen.
Teńiz kenishinde 800 medıtsınalyq oqshaýlaý bólmesi men ýaqytsha juqpaly aýrýlar aýrýhanasynda karantındik 380 oryn daıyndalǵan. Sonymen qatar, Teńizde táýligine 2000, al Atyraý qalasynda táýligine 300 PTR synaǵyn ótkizýge arnalǵan qosymsha zerthanalar ashylǵan. Atyraý oblysyna táýligine 800 synaq ótkizetin jabdyqtardy syıǵa tartty. Jylyoı aýdanyndaǵy Teńiz ken ornyna jaqyn ornalasqan Qulsary qalasynda 200 oryndyq kópbeıindi medıtsınalyq keshen salynyp jatyr.
Pandemııa bastalǵaly kompanııa Atyraý oblysynyń ákimdigine medıtsına qyzmetkerleri men turǵyndardyń qajettiligi úshin quny 3,3 mlrd. teńgeden asatyn qajetti qural-jabdyqtar satyp alyp bergen. Sondaı-aq, 648000-nan astam jeke qorǵanys quralyn, 56 ottegi kontsentratoryn, 252 medıtsınalyq qural-jabdyq pen 20 jeldetkish, koronavırýs ınfektsııasyn anyqtaýǵa arnalǵan 2 PTR quralyn, medıtsınalyq avtokólik, pırometrler, teplovızorlar men dezınfektsııa quraldaryn, reanımobılder men jedel járdem mashınalaryn satyp aldy. Stýdentterdi jáne dári-dármekterdi Atyraý oblysyna jetkizý úshin arnaıy áýe reısteri uıymdastyrylǵan.
«Bizdiń kompanııanyń qarjylyq qoldaýymen Jylyoı aýdanynda arnaıy COVID-taksı jumys isteıdi. Memlekettik organdarmen birlesip, ǵalamdyq pandemııaǵa qarsy kúreste halyqqa qajetti qoldaý kórsetýin odan ári jalǵastyrady. Kompanııa úshin Jylyoı aýdany, ásirese Qulsary qalasy erekshe mańyzǵa ıe. Bul – tek bizdiń óndiris ornalasqan jer ǵana emes, sonymen qatar, qyzmetkerlerimizdiń týyp-ósken aımaǵy. TShO ózi qyzmet atqaratyn qoǵamdastyqqa ınvestıtsııa quıýǵa árdaıym daıyn. Sondyqtan, kóptegen jyldar boıy áleýmettik ınfraqurylymdy damytý jobalaryna qoldaý kórsetilip keledi» - dep túsinik berdi kompanııanyń baspasóz qyzmetinen.
Eske sala ketelik, budan buryn Atyraýda koronavırýs ınfektsııasymen kúres qalaı júrgen jazǵan bolatynbyz.