Teńiz kenishinde koronavırýsqa shaldyqqandarmen baılanysta bolǵan 1,5 myń jumysshy anyqtaldy
ATYRAÝ. QazAqparat - Teńiz kenishinde koronavırýsqa shaldyqqandarmen baılanysta bolǵan 1,5 myńnan astam jumysshy anyqtaldy, dep habarlaıdy QazAqparat.
Atyraý oblysynda tótenshe jaǵdaı rejımin qamtamasyz etý jónindegi shuǵyl shtab málimetinshe, olar - naýqaspen jaqyn qarym-qatynasta bolǵan jáne baılanys jasaǵandar.
Eske sala ketelik, 16 sáýirden bastap Teńiz kenishinen shuǵyl emes personaldy shyǵarý bastalǵan bolatyn. Tutastaı alǵanda 17 myńnan astam jumysshyny shyǵarý josparlanyp otyr.
«Onyń ishinde 6 myńnan astam jumysshy - Atyraý oblysynyń, 2 myńnan astamy - Aqtóbe jáne Batys Qazaqstan oblystarynyń, 600-den astamy - Mańǵystaý oblysynyń turǵyndary. Qalǵan qyzmetkerler - Qazaqstannyń ózge óńirlerinen kelgen mamandar» dep naqtylady shuǵyl shtab.
Qazirgi ýaqytta 10 myńnan astam jumysshy shyǵaryldy. Onyń ishinde 4 myńǵa jýyq jumysshy - áýe jolymen, 3 myńǵa jýyq jumysshy - temir jol qatynasymen, 3 myńnan astam jumysshy - avtobýs kóligimen tasymaldandy. Qalǵan jumysshylardy shyǵarý protsesi 5 mamyrda aıaqtalady dep kútilýde.
Búgingi tańda Teńiz kenishindegi jumysshylar arasynda qaýipti dertke shaldyqqandar sany 71 adamǵa jetti. 12 jumysshy jazylyp shyqty.
Teńiz kenishinde koronavırýsqa shaldyqqandarmen baılanysta bolǵan 1,5 myńnan astam jumysshy anyqtaldy. Onyń ishinde 847 adam - jaqyn qatynasta, 718 adam - baılanysta bolǵan.
