Teńiz kenishinde aıaldamada qaldyrylǵan sómke kúdik týdyrdy
ATYRAÝ. QazAqparat – Atyraý oblysyndaǵy Teńiz kenishinde aıaldamada qaldyrylǵan sómke kúdik týdyrdy, dep habarlaıdy QazAqparat.
Oblystyq polıtsııa departamentiniń baspasóz qyzmetinen málim etkendeı, 20 mamyrda saǵat 8:15 shamasynda Teńiz kenishindegi aıaldamalardyń birinde belgisiz sómke anyqtalǵany týraly habar túsken.
«Oqıǵa ornynda quqyq qorǵaý organdarynyń qyzmetkerleri tıisti algorıtmke sáıkes áreket etti. Azamattardyń qaýipsizdigin qamtamasyz etý maqsatynda aımaqty qorshaýǵa aldy. Arnaýly mamandar aıaldamada kúdik týdyrǵan sómkeni tekserdi. Sómkeniń ishine jarylǵysh nemese ózge de qaýip tóndiretin zattar salynbaǵany anyqtaldy», -dep habarlady departamenttiń baspasóz qyzmeti.
