Teńiz kenishinde 88 jumysshy koronavırýsqa shaldyqty

ATYRAÝ. QazAqparat – Atyraý oblysyndaǵy Teńiz kenishinde 88 jumysshy qaýipti indetke shaldyqty, dep habarlaıdy QazAqparat.

Oblystyq densaýlyq saqtaý basqarmasy baspasóz qyzmetiniń málimetine qaraǵanda, ótken táýlikte 116 adamnan koronavırýs ınfektsııasy anyqtalǵan. Naýqastardyń deni Atyraý qalasy men Teńiz kenishinde baıqalyp otyr.

«Oblys ortalyǵynan 17, Teńiz kenishinde 88 jumysshy qaýipti vırýsqa shaldyqty.

Sondaı-aq, Jylyoı aýdanynda 4, Qyzylqoǵada – 1, Maqatta – 1, Qurmanǵazy aýdanynda 5 adam koronavırýs juqtyrdy. 28 naýqasta Sovid-19 sımptomdy túri baıqaldy», - dep habarlady basqarmanyń baspasóz qyzmetinen.

Qazir úı jaǵdaıynda emdelip jatqan 292 adam bar. Oblystyq ınfektsııalyq statsıonarda 106, aýdandardaǵy statsıonarlarda 37, Teńiz kenishindegi statsıonarda 622 adam em qabyldap jatyr. Ótken táýlikte koronavırýstan 90 adam emdelip shyqqan.

Eske sala ketsek, buǵan deıin Atyraý oblysynda 1032 naýqas emdelip jatqanyn jazǵan bolatynbyz.