Teńiz kenishi: Bir kúnde 20 jumysshydan KVI anyqtalyp, 25-i qaýipti indetten aıyqty
ATYRAÝ. QazAqparat – Búgin Atyraýda Teńiz kenishiniń 20 jumysshysynan koronavırýs ınfektsııasy anyqtaldy. Al, 25 jumysshy qaýipti indetten aıyqty, dep habarlaıdy QazAqparat.
Óńirlik jedel shtabtyń málimetine súıensek, ótken táýlikte 21 adamnan qaýipti indettiń belgisi anyqtalǵan. Onyń ishinde Teńiz kenishiniń 20 jumysshysy bar. Al, taǵy bir naýqas Qurmanǵazy aýdanynyń turǵyny bolyp shyqty.
Sondaı-aq, búgin koronavırýs ınfektsııasynan 26 adam jazylyp shyqqan. Patsıentterdiń 25-i –Teńiz kenishiniń jumysshylary. Al, bireýi Atyraý qalasynyń 52 jastaǵy turǵyny eken.
«Qaýipti indet Teńiz kenishinde jumys istegen 16 er adam men 4 áıelden anyqtaldy. Sonymen birge, Qurmanǵazy aýdanynyń 48 jastaǵy turǵyny buryn indet juqtyrǵanmen baılanysta bolǵan. Bári ınfektsııalyq statsıonarǵa jatqyzylyp, algorıtmge sáıkes em qabyldaýda. Al, búgin qaýipti indetten aıyqqandardyń bári ózderin jaqsy sezinedi. Olardan koronavırýstyń bar-joǵyn anyqtaý úshin alynǵan sońǵy test teris nátıje kórsetti», - dep habarlady jedel shtabtan.
Búgin Atyraý oblysynda koronavırýs ınfektsııasyn juqtyrǵandar 944 adamǵa jetti. Al, jazylyp shyqqan patsıentterdiń sany 262 adamdy qurady.
Eske sala ketelik, buǵan deıin oblys ákimi Mahambet Dosmuhambetov Teńiz kenishindegi ahýal turaqtalsa, jumysshylar jumys ornyna oralatynyn aıtqan edi. Sondaı-aq, Atyraýda koronavırýspen kúreske 1 mlrd teńge astam qarjy jumsaldy dep jazǵan edik.
