Teńiz keni ornynda toǵyz aıda 21,5 mln tonna munaı óndirdi

ATYRAÝ. QazAqparat - Atyraý oblysyndaǵy Teńiz ken ornynda shıki munaı óndirý kólemi 2018 jyldyń úsh toqsanynda 21,5 mln  tonnany qurady, dep habarlaıdy QazAqparat tilshisi «Teńizshevroıl» JShS baspasóz qyzmetine silteme jasap. 

«Ústimizdegi jyldyń qańtar-qyrkúıek aılarynda Teńizde 21,5 mln tonna nemese 171,3 mln barrel munaı óndirildi. TShO alǵashqy úsh toqsanda 1 mln tonna suıytylǵan gaz, 6,9 mlrd tekshe metr qurǵaq gaz jáne 1,8 mln tonna kúkirt óndirdi», - dep málimdedi kompanııanyń baspasóz qyzmeti.

Teńiz munaı ken orny 1979 jyly ashylǵan. Ol álemdegi eń tereń ári iri munaı kenderiniń biri. «Teńizshevroıl» JShS 1993 jylǵy 6 sáýirde Qazaqstan Respýblıkasy men «Shevron» kompanııasynyń arasyndaǵy kelisim negizinde quryldy. Búginde kompanııa aktsııalarynyń 50 paıyzy «Shevron», 20 paıyzy «QazMunaıGaz» UK» AQ, 25 paıyzy «EksonMobıl Kazahstan Venchýrs Ink.», qalǵan 5 paıyzy «LýkArko» birlesken kásipornyna tıesili.