Teńiz ken ornyndaǵy jumysshylar bir rettik syıaqyǵa qatysty túsinik berýdi talap etti

ATYRAÝ. QazAqparat – Teńiz ken ornyndaǵy jumysshylar bir rettik syıaqyǵa qatysty túsinik berýdi talap etti. Bul derekti Atyraý oblysy ákimi men «Teńizshevroıl» JShS-niń baspasóz qyzmetteri rastady, dep habarlaıdy QazAqparat tilshisi.

«Búgin, 11 aqpan kúni saǵat 10:30-da úzilis kezinde Teńiz ken ornynyń úshinshi býyn zaýyty jobasynyń 42-ýchaskesine tartylǵan «Senimdi Kurylys» JShS-niń 200 qyzmetkeri jınalyp, narazylyq tanytty. Olar 2022 jylǵy 31 jeltoqsanǵa deıin jumysqa qabyldanǵan qyzmetkerlerge bir rettik syıaqyǵa qatysty túsindirme berýdi talap etti», - dep habarlady oblys ákiminiń baspasóz qyzmeti.

Qazir Atyraý oblysy ákiminiń tapsyrmasymen Teńiz ken ornyndaǵy jaǵdaıǵa baılanysty Jylyoı aýdany ákimi Jumabek Qarajanov jetekshilik etetin arnaıy komıssııa quryldy. Komıssııa quramynda «Teńizshevroıl» JShS-niń ókilderi, «Senimdi Kurylys» basshylyǵy men jumysshylary, Atyraý oblystyq memlekettik eńbek ınspektsııasy basqarmasynyń qyzmetkerleri bar.

Al, «Teńizshevroıl» JShS baspasóz qyzmetiniń aqparatyna qaraǵanda, jalaqysy 8,4% óspegen kompanııalardyń qyzmetkerleri 500 myń teńge alady. Jalaqysy kóterilgen kompanııalardyń qyzmetkerleri 300 000 teńgeden alady.

Osylaısha, osy bonýsqa ıe barlyq jumysshylarǵa tólemder teńdigi saqtalady. Bul bonýs tek bir ret tólenedi.

Teńiz – Atyraý oblysynyń Jylyoı aýdanyndaǵy ken orny. Munda halyqaralyq mańyzy bar eki joba iske asyrylyp jatyr. Oǵan qazaqstandyq jáne sheteldik birneshe kompanııa merdigerlikke tartylǵan. Sonyń biri – «Senimdi Kurylys» JShS.

Eske sala ketelik, buǵan deıin Atyraý oblysynda 337 jumysshynyń 59 mln teńge jalaqy bereshegi ótelgenin habarlaǵan bolatynbyz.

Ashyq kózderden alynǵan foto