Teńiz ken ornyndaǵy jobalardy iske qosý 6 aıǵa deıin keshigýi múmkin

Atyraý oblysynda ornalasqan Teńiz ken ornyndaǵy jobalardy iske qosý 3 aıdan 6 aıǵa keshigýi múmkin, dep habarlaıdy QazAqparat tilshisi.

Teńiz – álemdegi eń iri ken oryndarynyń biri. Ken orny Atyraý oblysynynń Jylyoı aýdanynda ornalasqan. Ony ıgerýshi «Teńizshevroıl» JShS-niń baspasóz qyzmetinen málim etkendeı, munda Keleshek keńeıý (KKJ) jáne Uńǵyma erneýindegi qysymdy basqarý jobalary (UEQBJ) iske asyrylyp jatyr. Jobanyń qurylys-montaj jumystaryn aıaqtaý merzimi osy toqsanǵa josparlanǵan.

Burynǵysha Keleshek keńeıý jáne Uńǵyma erneýindegi qysymdy basqarý jobalaryn (KKJ-UEQBJ) qaýipsiz ári kidirissiz iske qosýǵa basa nazar aýdarylyp otyr. Joba boıynsha qurylys-montaj jumystarynyń aıaqtalýy osy toqsanǵa boljanyp otyr. Sońǵy ýaqytta iske qosý jumystary kútilgennen baıaý júrdi. «Teńizshevroıl» aktsıonerlerge UEQBJ-nyń 3 aıǵa, KKJ-niń 6 aıǵa keshiktirilýine ákelýi yqtımal josparlaý nusqalaryn usyndy. TShO kesteden qalýdy qysqartý úshin arnaıy sharalar qabyldady, - dep habarlady kompanııanyń baspasóz qyzmeti.

Eske sala ketelik, budan buryn Teńiz ken ornynda 6 myńnan astam adam jumystan bosatylatynyn jazǵan edik. «Teńizshevroıl» JShS kúrdeli jobalar jónindegi bas menedjerdiń orynbasary Erbol Jumaǵazıevtiń aıtýynsha, byltyrǵy qarasha-jeltoqsan aılaryna jasalǵan boljamǵa sáıkes 6 159 adam jumystan bosatý josparlanǵan. Al, 753 adam basqa jumysqa aýystyrylatyny kózdelgen.