«Teńiz» ken ornyndaǵy joba josparǵa sáıkes atqarylýy qajet - energetıka mınıstri

ATYRAÝ. QazAqparat – Energetıka mınıstri Bolat Aqsholaqov «Teńiz» ken ornyndaǵy eń iri Keleshek keńeıý-Uńǵyma erneýiniń qysymyn basqarý (KKJ-UEQB) jobasyn iske asyrý barysymen tanysty. «Teńizshevroıl» basshylyǵyna atalǵan jobany iske asyrý kestesinen aýytqymaýdy tapsyrdy, dep habarlaıdy QazAqparat tilshisi.

«Álemdik syn-qaterlerge qaramastan, jobany iske asyrý kestesin ustaný qajet. Kompanııa otandyq óndirýshiler men qyzmetkerlerdiń ál-aýqatyn qamtamasyz ete otyryp, qazaqstandyq úlesti damytýǵa erekshe nazar aýdarýdy jalǵastyrýy qajet», - dedi energetıka mınıstri Bolat Aqsholaqov.

Mınıstr KKJ-UEQB jobasy sátti iske qosylsa, TShO-dan Qazaqstan bıýdjetine túsetin túsimder edáýir artatynyn atap ótti. Bıylǵy alty aıda TShO el ekonomıkasyna bes jyl ishindegi rekordtyq 7,5 mlrd AQSh dollaryn baǵyttaǵan.

Joba iske asyryla bastaǵannan beri kompanııa 14,2 mlrd AQSh dollarynan astam qarjyǵa qazaqstandyq taýarlardy, jumystar men kórsetiletin qyzmetterdi satyp alǵan. Sondaı-aq, 25 myńnan astam adamdy oqytqan.

«Teńizshevroıl» JShS basshylarynyń málimetinshe, KKJ-UEQBJ jobasy 93%-ǵa aıaqtalyp tur. Qazir barlyq jumystar «Teńiz» ken ornynda shoǵyrlanǵan. Jazdyń basynda ken orny operatory – «Teńizshevroıl» JShS-niń barlyq zaýytyn biriktiretin, senimdiligin arttyratyn jáne óndiristik kórsetkishterdi ońtaılandyratyn óndiristi biregeı basqarý ortalyǵy iske qosyldy. KKJ-UEQB jobasy sheńberinde tórt qondyrǵy josparlanǵan. Bıylǵy shildeden tórtinshi – jańa ólsheý qondyrǵysy munaı qabyldaı bastady. Sondaı-aq, ekinshi toqsanda qysymdy ulǵaıtý qondyrǵysyna qýat beretin kishi elektr stantsııasyna kerneý berilgen.

Buǵan deıin jobanyń 408 modýlin «Teńiz» ken ornyna jetkizý úshin úsh jyldyq baǵdarlama iske asyrylǵan. Merdigerlikke tartylǵan qazaqstandyq kompanııada 126-dan astam keme bolǵan. Onyń ishinde 40 keme jańadan qurastyrylyp, keıbiri osy joba úshin arnaıy ózgertilgen. Kaspıı teńizi arqyly tasymaldaýdy damytýdy qoldaý maqsatynda halyqaralyq deńgeıdegi kásibı teńizshilerdi daıarlaıtyn Qazaqstandaǵy jalǵyz oqý orny – QBTÝ janyndaǵy Qazaqstandyq teńiz akademııasy (QTA) iske qosyldy.

Modýldik júkterdi qabyldaý jáne odan ári tasymaldaý úshin «Teńiz» ken ornynyń shekarasynan shamamen 40 km jerde ornalasqan Prorva túbeginde port salynǵan. Bul porttyń aýmaǵynda uzyndyǵy 76 km teńizge kirý arnasy, júkterdi túsirýge jáne saqtaýǵa arnalǵan nysandar bar.

Mınıstr KKJ-UEQB jobasynan bosatylatyn jumysshylarǵa baılanysty monıtorıng júrgizý jáne tyǵyz ózara is-qımyl jasaý qajettigin atap ótti. Qazir «Teńizshevroıl» JShS Atyraý oblysy ákimdigimen, Energetıka men Eńbek jáne halyqty áleýmettik qorǵaý mınıstrlikterimen birlesip, qyzmetkerlerdi bosatý protsesine monıtorıng júrgizýdi qolǵa alǵan.

Eske sala ketelik, buǵan deıin energetıka mınıstri «Qashaǵan» ken ornynda bolǵan edi