Teńiz ken ornyndaǵy jarylysqa qatysty sotqa deıingi tergeý bastaldy

ATYRAÝ. QazAqparat – Atyraý oblysyndaǵy Teńiz ken ornynda kólik tsısternasy jarylyp, bir jumysshy mert boldy. Taǵy bir jumysshy jaraqat aldy. Qazir jarylysqa baılanysty sotqa deıingi tergeý bastaldy, dep habarlaıdy QazAqparat.

Oblystyq Polıtsııa departamentiniń baspasóz qyzmetinen málim etkendeı, Qylmystyq kodekstiń 156-babymen is qozǵaldy. Qazir sotqa deıingi tergep-tekserý amaldary júrip jatyr.

Oqıǵa keshe, 8 aqpanda saǵat 13:50 shamasynda Teńiz ken ornynyń óndiristik aýmaǵynan tys jerde bolǵan. «West Dala» kompanııasyna tıesili vakýým tsısternasy jarylǵan.

Sonyń saldarynan 30 jastaǵy jumysshy oqıǵa ornynda mert boldy. Al 29 jastaǵy jumysshy túrli dene jaraqatymen aýrýhanaǵa jetkizildi.

«Teńiz ken ornynda bir jumysshynyń mert bolyp, ekinshi adamnyń jaraqat alýyna baılanysty sotqa deıingi tergeý bastaldy. Tergeý QR Qylmystyq kodeksiniń 156-babymen (Eńbekti qorǵaý qaǵıdalaryn buzý) júrip jatyr», - dep málim etti Polıtsııa departamentiniń baspasóz qyzmetinen.

Teńiz – Jylyoı aýdanynda ornalasqan ken orny. Munda halyqaralyq mańyzy bar eki joba iske asyrylyp jatyr. Oǵan qazaqstandyq jáne sheteldik birneshe kompanııa merdigerlikke tartylǵan.

Byltyr bul ken ornynda jarylys bolyp, eki adam qaza tapqan edi. Taǵy úsh adam dene jaraqatyn aldy.Ken ornyndaǵy atmosferalyq gazy bar qubyrda gıdrotest júrgizilgen. Qysymǵa tótep bere almaǵan qubyr jarylyp ketken.

«Jylyoı aýdanynda ornalasqan Teńiz qalashyǵynda qubyr jarylyp, sonyń saldarynan 1985 jyly týǵan eki qyzmetker qaıtys boldy. Úsh adam jaraqattandy. Zardap shekken 3 qyzmetkerge medıtsınalyq kómek kórsetilip jatyr», - dep málim etken edi Polıtsııa departamentiniń baspasóz qyzmetinen.