Teńiz ken ornyndaǵy ınfektsııalyq statsıonarda 574 naýqas jatyr

ATYRAÝ. QazAqparat – Atyraý oblysynda ornalasqan Teńiz ken ornyndaǵy epıdemıologııalyq ahýal áli de kúrdeli kúıde. Qazir mundaǵy ınfektsııalyq statsıonarda qaýipti vırýs juqtyrǵan 574 naýqas emdelip jatyr, dep habarlaıdy QazAqparat.

Oblystyq densaýlyq saqtaý basqarmasynyń baspasóz qyzmetinen málim etkendeı, ótken táýlikte óńirdiń 317 turǵyny koronavırýs ınfektsııasyna shaldyqqan. Onyń ishinde Atyraý qalasynda 176, Teńiz ken ornynda 41 naýqas tirkelgen.

Qaýipti vırýstyń taralýy jeti aýdanda da anyqtalyp otyr. Máselen, Jylyoıda – 25, Isataıda – 25, Maqatta – 17, Qyzylqoǵada – 14, Inderde – 11, Qurmanǵazyda – 11, Mahambet aýdanynda 7 adamnan koronavırýstyń belgisi tabylǵan.

Sondaı-aq, ótken táýlikte koronavırýs ınfektsııasyn juqtyrǵan 7 adam qaıtys bolǵan.

«Qazir 8 054 adam úı jaǵdaıynda emdelý úshin oqshaýlandy. Teńiz ken ornyndaǵy ınfektsııalyq statsıonarda – 574, aýdandardaǵy statsıonarlarda – 309, modýldik aýrýhanada – 193, №2 oblystyq aýrýhanada – 184, kardıologııalyq ortalyqta – 94, oblystyq aýrýhanada – 93, temirjol aýrýhanasynda – 86, ftızıopýlmanologııa ortalyǵynda 63 naýqas emdelip jatyr. Al, statsıonarǵa laıyqtalǵan jataqhanada 78 patsıent em qabyldaýda» -dep habarlady basqarmanyń baspasóz qyzmeti.

Eske sala ketelik, Atyraýda bir kúnde koronavırýs ınfektsııasynan 9 adam qaıtys boldy.