Teńiz ken ornynda ýlanǵandar sany artty
ATYRAÝ. QazAqparat - Jylyoı aýdany, Qulsary qalasyndaǵy aýrýhanaǵa «Montajarnaıyqurylys» AQ-nyń tamaqtan ýlanǵan taǵy eki qyzmetkeri jatqyzyldy. Osymen Teńiz ken ornynda tamaqtan ýlanǵandar sany 28-ge jetip otyr, dep habarlaıdy QazAqparat tilshisi.
«Jappaı ýlaný oqıǵasy seısenbi kúni keshkisin Bolashaq kentinde, Teńiz ken ornynda boldy. Bastapqyda 21 adam aýrýhanaǵa túsken. Búgin ýlanǵandar sany taǵy artty. Zardap shekkender tamaqtanǵan ashanadan tekserý úshin synama alyndy. Olardy zerthanada mamandar zerttep jatyr. Aldyn ala boljam boıynsha, naýqastar jumyrtqa qosylǵan taǵamnan ýlanǵan bolýy múmkin», - deıdi Atyraý oblystyq qoǵamdyq densaýlyqty saqtaý departamenti basshysynyń orynbasary Erbolat Ýaıysov.
Eske sala keteıik, keshe Bolashaq vahtalyq kentindegi ashanalardyń birinde tamaqtanǵan jumysshylar jappaı ýlanyp, aýrýhanaǵa túskenin habarlaǵan edik.
Avtor: A. Sokolov
