Teńiz ken ornynda qyzylsha aýrýy taraǵan joq
ATYRAÝ.QazAqparat - Atyraý oblysynda, sonyń ishinde Teńiz ken ornynda epıdemıologııalyq ahýal birqalypty, dep habarlaıdy QazAqparat.
Atyraý oblystyq qoǵamdyq densaýlyq saqtaý departamenti mamandarynyń aıtýynsha, qyzylsha aýrýymen tirkelgender sany azaıyp keledi. Jyl basynan beri Jylyoı aýdanyndaǵy Teńiz ken ornynda qyzylsha aýrýynyń 4 deregi tirkeldi.
«Alǵashqy oqıǵa qańtar aıynda anyqtaldy, naýryzda qyzylshamen 3 adam aýyrdy. Aýyrǵandardyń ekeýi qarym-qatynas arqyly juqtyrǵan, jasy 45-ten joǵary, vaktsınaǵa alýǵa jatpaıdy. Qarym-qatynastaǵy basqa adamdar ekpe aldy. Aýrýdyń taraýy tirkelgen joq, jaǵdaı baqylaýda», - dep málimdedi Atyraý oblystyq qoǵamdyq densaýlyq saqtaý departamentinen.
Aıta ketsek, jyl basynan beri aımaqta 9 myń adam qyzylshaǵa qarsy josparly vaktsınatsııamen qamtylǵan. Sáýir aıynan bastap qaýip-qater tobyndaǵy 9-10 aılyq náresteler, 40 jasqa deıingi medıtsınalyq qyzmetkerler men qyzylsha oshaǵyndaǵy 30 jasqa deıingi adamdar ekpe alyp jatyr.
«11 sáýirdegi málimet boıynsha, qosymsha 1062 adamǵa ekpe salyndy. Qyzylshaǵa qarsy ımmýndaý jumystary jalǵasýda, aldyn alý, epıdemııaǵa qarsy sharalardy úılestirý shtaby quryldy, turǵyndarmen túsinik jumystary jalǵasyn taýyp jatyr»,-dep naqtylady departamenttegiler.
Qazir Atyraý oblysynda qyzylshaǵa qarsy vaktsına jetkilikti. Bıyl 16 000 doza vaktsına alyndy, taǵy qosymsha 15 450 doza alynady, sonymen qatar, qaýip-qater tobyndaǵylarǵa salýǵa 20 500 doza vaktsınaǵa tapsyrys berildi. Ekpe salý jumystary arnaıy kabınette ótýde. Medıtsına qyzmetkerleri vaktsınatsııa ótkizý boıynsha daıyndyqtan jáne attestatsııadan ótken.
