Teńiz ken ornynda koronavırýstyń ýshyǵýyna ne sebep

NUR-SULTAN. QazAqparat - QR DSM Taýarlar men kórsetiletin qyzmetterdiń sapasy men qaýipsizdigin baqylaý komıtetiniń tóraǵasy Tımýr Sultanǵazıev Teńiz ken ornynda koronavırýs indetiniń ýshyǵý sebebin túsindirdi, dep habarlaıdy QazAqparat tilshisi.

«Keıbir óńirde indet juqtyrǵandardyń sany artyp, endi keıbirinde múldem tirkelmegenin kórip otyrmyz. Karantın sharalaryn bosańsytý - keıbir óńirde indet juqtyrǵandar sanynyń artýyna sebep boldy. Kóp adam jumys isteıtin jabyq ujymdarda, máselen, «Teńizshevroıl» jáne onyń Atyraý oblysyndaǵy merdiger jáne sýbmerdiger uıymdarynda vırýs juqtyrǵandardyń sany kóp. Bul, Shymkenttegi «PetroKazakhstan» kompanııasyna da qatysty. Biz olarda ujymnyń «jabyq» bolǵandyǵynan, vahtalyq kentte turatyndyqtan, bastapqyda jarııa etilgen jáne usynylǵan karantın sharalarynyń saqtalmaýynan birden ósim bolǵanyn kórip otyrmyz», - dedi ol.

Komıtet basshysynyń atap ótýinshe, mundaı jaǵdaıda uıymnyń basshylyǵy men jumys berýshiler barlyq sharalardyń saqtalýyna jaýapty bolady. Olar karantın talaptarynyń mindetti túrde oryndalýyn qamtamasyz etýi kerek.

«Jalpy, karantın sharalarynyń jeńildetilýine baılanysty óńirlerdegi barlyq jedel shtabtarǵa jáne jergilikti atqarýshy organdarǵa karantın sharttarynyń saqtalýyn baqylaýdy kúsheıtý, sholǵyndaý tekserýlerin júrgizý usynysy berildi. Karantın talaptaryn jeńildetkenniń ózinde bas sanıtar dárigerdiń qaýlysyna sáıkes qaýipsizdik sharalaryn saqtaý qajettigin túsingenimiz jón», - edi Tımýr Sultanǵazıev.

Buǵan deıin Atyraý oblysyndaǵy Teńiz kenishinde koronavırýstyń 17 oshaǵy anyqtalǵanyn habarlaǵan edik.