Teńiz ken ornynda koronavırýs juqtyrǵandar sany kúrt ósti

ATYRAÝ. QazAqparat – Atyraý oblysyndaǵy Teńiz ken ornynda bir táýlikte koronavırýs ınfektsııasyn juqtyrǵandar sany kúrt ósti, dep habarlaıdy QazAqparat.

Oblystyq densaýlyq saqtaý basqarmasy baspasóz qyzmetinen málim etkendeı, ótken táýlikte 550 adam qaýipti vırýsqa shaldyqqany anyqtalǵan.

Onyń ishinde Atyraý qalasynda – 241, Jylyoı aýdanyndaǵy Teńiz ken ornynda 185 naýqas tirkelgen. Sondaı-aq, Qyzylqoǵa aýdanynda – 27, Jylyoıda – 27, Inderde – 26, Isataıda – 17, Maqatta – 15, Mahambette – 10, Qurmanǵazy aýdanynda 2 adamnan koronavırýs ınfektsııasy tabylǵan.

Naýqastardyń arasynda 340 adam sımptomdy belgisimen aýyrǵan. Ótken táýlikte koronavırýs ınfektsııasynan 489 naýqas saýyǵyp shyqqan.

«Qazir 8 143 adam úı jaǵdaıynda em qabyldaýda. Óńirdegi ınfektsııalyq statsıonarlarda 1 789 naýqas emdelip jatyr. Onyń ishinde Teńiz ken ornyndaǵy statsıonarda – 412, aýdandardaǵy statsıonarlarda – 387, modýldik aýrýhanada – 192, №2 oblystyq aýrýhanada – 189, oblystyq aýrýhanada – 176, temirjol aýrýhanasynda – 106, kardıologııalyq ortalyqta 101 naýqas bar. Sondaı-aq, ftızıopýlmanologııa ortalyǵynda – 97, al, jataqhanalarda 129 patsıent oqshaýlanǵan» -dep habarlady basqarmanyń baspasóz qyzmeti.

Eske sala ketelik, budan buryn Atyraý oblysynda eki táýlikte 1 078 adam koronavırýs juqtyrǵanyn habarlaǵan bolatynbyz.