Teńiz ken ornynda aýaǵa normadan artyq 425 tonna zııandy zat shyǵarylǵan
Atyraý oblystyq ekologııa departamenti basshysynyń mindetin atqarýshy Abzal Temirovtiń aıtýynsha, ken ornynda jumys isteıtin 10-nan astam merdiger kásiporyn ekologııalyq zańdylyqty buzǵan.
«Ken ornyndaǵy merdiger kompanııalarǵa tıesili nysandarda ornalasqan statsıonarlyq kózder bar. Sol statsıonarlyq kózderde shyǵaryndylardyń normatıvteri asqany anyqtalyp otyr. Máselen, atmosferaǵa kúkirtsýtegi, azotdıoksıdi, kómirtegi oksıdi sekildi shyǵaryndylar ruqsat etilgen mólsherden kóp shyǵarylǵan. Jalpy normadan asý deregi 425 tonna. Al ruqsat alynbaı, aýaǵa jiberilgen shyǵaryndylardyń úlesi shamamen 5 tonnadan asqan. «Teńizshevroıl» kompanııasynyń nysanynda rezervýar parki bar. Sol rezervýar parkinde jerdi munaımen lastaý deregi anyqtaldy», - deıdi Abzal Temirov.
Eske sala ketelik, buǵan deıin Tabıǵatty lastaǵan «Teńizshevroıl» kompanııasyna 2,8 mlrd teńge aıyppul salynǵanyn habarlaǵan bolatynbyz.
Atyraý oblystyq ekologııa departamentine Atyraý oblysynyń mamandandyrylǵan tabıǵat qorǵaý prokýratýrasynan «Teńizshevroıl» JShS tarapynan qorshaǵan ortaǵa ekologııalyq ruqsatsyz emıssııalardy shyǵarý, ruqsat etilgen normatıvterden asyp ketý jáne jer búldirý derekteri anyqtalǵany kórsetilip, zań buzýshylyqqa jol bergen kompanııany ákimshilik jaýapkershilikke tartý usynylǵan.
«Osyǵan oraı departament qyzmetkerleri «Teńizshevroıl» JShS-ne qatysty QR Ákimshilik quqyq buzýshylyq týraly kodeksiniń 328 jáne 337-babynyń talabyna sáıkes ákimshilik quqyq buzýshylyq týraly hattamalar toltyrdy. Ákimshilik quqyq buzýshylyq týraly isterdi qaraý úshin Jylyoı aýdandyq sotyna joldandy. Jylyoı aýdandyq sotynda atalǵan ister biriktirilip qaralǵan. Sottyń qaýlysymen «Teńizshevroıl» kompanııasyna jalpy somasy 2,8 mlrd teńge kóleminde ákimshilik aıyppul salyndy», - dep habarlady departamenttiń baspasóz qyzmeti.
