Teńiz ken ornynda ashyq aspan astynda jınalǵan kúkirt kólemi jyl saıyn kóbeıip barady
ASTANA. Naýryzdyń 17-si. QazAqparat /Qanat Mámetqazyuly/ - Búgin QR Parlamenti Májilisiniń jalpy otyrysynda Úkimet basshysynyń atyna saýal joldaǵan depýtat Uzaqqalı Eleýbaev Atyraý óńirindegi Teńiz ken orynynda jınaqtalyp qalǵan kúkirt shıkizaty máselesin kóterdi.
Depýtat bul rette jaǵdaıdy tıimdi sheshý úshin Ekologııalyq kodekske ózgerister men tolyqtyrýlar engizý qajettigin alǵa tartady, dep habarlaıdy QazAqparat.
«Atyraý óńiriniń ekologııasy búgingi kúni kúrdeli máselelerdiń birine aınalyp otyr. Osy óńirdegi kúkirttiń ashyq ádispen saqtalýy jergilikti turǵyndardyń densaýlyǵyna orasan zor zııan tıgizip otyrǵanyn medıtsına jáne ekologııa mamandary dáleldep, buqaralyq aqparat quraldarynda talaı másele kóterdi. Biraq, «Teńizshevroıl» JShS-ne qarasty Teńiz ken ornynda ashyq aspan astynda jatqan kúkirt azaıýdyń ornyna jyldan-jylǵa kóbeıýde. Sol sebepten, Atyraý oblysynyń máslıhat depýtattary men úkimettik emes uıymdarynyń alańdaýshylyq bildirip jazǵan haty oryndy dep bilemiz. Osyǵan oraı, Qazaqstan Respýblıkasy Qorshaǵan ortany qorǵaý mınıstrligi QR Ekologııalyq kodeksine arnaıy ózgerister engizse, kúkirt shıkizaty máselesin zań júzinde retteıtin usynystar norma bolyp qamtylsa ıgi», dedi depýtat.
