Teńiz ken ornynda 7 myń jumysshy ózge jobalarǵa jumysqa alynady
Búgin bul týraly oblys ákimi Mahambet Dosmuhambetovtiń tóraǵalyǵymen ótken jıynda belgili boldy. Áleýmettik áriptestik pen áleýmettik jáne eńbek qatynastaryn retteý jónindegi oblystyq úsh jaqty komıssııa otyrysynda «Teńizshevroıl» JShS-niń merdiger kompanııalarynan qyzmetkerlerdiń bosatylýy jáne olardy jumysqa ornalastyrý, sondaı-aq, eńbek ujymdary arasyndaǵy eńbek daýlaryn boldyrmaý men eńbek qatynastarynyń jaǵdaıy jónindegi máseleler qaraldy.
«Teńizshevroıl» JShS-niń Úkimetpen jáne jurtshylyqpen baılanys bóliminiń bas menedjeri Rızabek Artyǵalıevtyń aıtýynsha, Keleshek keńeıý jobasynyń aıaqtalýyna baılanysty jyl sońyna deıin bosatylatyn jumysshylardyń 7 myńnan astamyn kompanııa ózindegi ózge jobalarǵa jumysqa alýdy qarastyryp otyr.
Oblystyq memlekettik eńbek ınspektsııasy basqarmasynyń basshysy Igilik Áýbákirovtiń málimetinshe byltyrǵy aqpanynan búginge deıin eńbek táýekeldiginde 56 mekeme bolǵan. Onyń ishinde 49 kompanııadaǵy eńbek daýlary sheshimin tapqan. Qazir 52 jumysshynyń aldyndaǵy 8 mln teńge bereshegi bar 3 mekememen jumystar júrgizilip jatyr.
«Keleshek keńeıý jobasynan jyl sońyna deıin bosatylatyn jumysshylardan basqa jumysqa aýystyrylatyndardyń tizimin ákimdikke ýaqytyly usyný kerek. Jobadan bosatylatyn jumysshylardyń aty-jóni, qujaty, mamandyǵy, meken-jaıy, baılanys nómiri kórsetilgen tizimin bir aı buryn, al naqty bosatylǵan jumysshylardyń tizimin ár aıdyń basynda berilgeni jón. Aldaǵy aılarda bosatylatyn jumysshylardy merdigerlik mekemelerge jumysqa ornalasýyna yqpal etińizder. Jumysqa ornalastyrý kezinde jergilikti turǵyndarǵa basymdyq berý jaǵyn da oılastyrý kerek. Merdiger, qosalqy merdiger kompanııalarda jalaqy tólemeýge jol bermeýdi, zań buzýshylyqtardy boldyrmaýdy qatań baqylaýda ustap, jumysshylar arasynda narazylyq týdyrmaý úshin naqty is-sharalardy qolǵa alý qajet», -dedi Mahambet Dosmuhambetov.
Eske sala ketelik, buǵan deıin Teńiz ken ornyndaǵy joba jumysynan bosatylatyndardyń arasynda 37 myń qazaqstandyq baryn habarlaǵan bolatynbyz.
