Teńiz ken ornynda 6 myńnan astam adam jumystan bosatylady
Bul týraly oblys ákimi janyndaǵy áleýmettik áriptestik pen eńbek qatynastaryn retteý jónindegi úsh jaqty komıssııa otyrysynda belgili boldy.
Oblystyq memlekettik eńbek ınspektsııasy basqarmasynyń basshysy Igilik Áýbákirovtiń aıtýynsha, qazir eńbek shartyn esepke alýdyń biryńǵaı júıesine engizý deńgeıi 82,4% qurap otyr.
«Atyraý qalasynda 455 mekemede 28 998, Jylyoı aýdanynda 3 869, Inderde – 213, Isataıda – 276, Maqatta – 117, Mahambette – 358, Qyzylqoǵada – 75, Qurmanǵazy aýdanynda 478 eńbek sharty biryńǵaı júıege tirkelmegen. Jyl sońyna deıin bul kórsetkishti 85%-ǵa jetkizý úshin basqarma basshylary men qala, aýdanda ákimderi Úkimettiń tapsyrmasyn jeke baqylaýǵa alýy qajet», -dedi Igilik Áýbákirov.
Al, «Teńizshevroıl» JShS kúrdeli jobalar jónindegi bas menedjerdiń orynbasary Erbol Jumaǵazıevtiń deregine qaraǵanda Teńiz jobasyndaǵy qyzmetkerlerdi josparly bosatý jumys kóleminiń aıaqtalýyna qaraı júzege asyrylady.
Máselen, qarasha-jeltoqsan aılaryna jasalǵan boljamǵa sáıkes 6 159 adam jumystan bosatylady.
Al, 753 adam basqa jumysqa aýystyrylady.
«Bıylǵy tamyzda Atyraý oblysy ákimdiginiń jobadan bosatylatyn qyzmetkerlerge qoldaý kórsetý jónindegi usynysyna oraı qysqa merzimdi oqytý kýrstary iske qosyldy. Qazir jobadan bosatylǵan 81 adam atalǵan kýrstan ótti. Onyń ishinde 64 adam jumysqa ornalasty», -deıdi Erbol Jumaǵazıev.
Oblys ákimi Serik Shápkenovtiń pikirinshe, eńbek kelisimshartyn júıeleý, qyzmetkerlerge áleýmettik aýdarymdy ýaqytyly júrgizý qajet.
«Kez kelgen mekemede jalaqyǵa nemese áleýmettik tólemderge qatysty eshqandaı másele týyndamaýy qajet. Eger basshylar bul jumysty júrgize almasa, ornyn bosatýyna týra keledi. Basshynyń salǵyrttyǵynan qyzmetkerler qıyndyq kórmeýi tıis. Qyzmetkerler jumysyn adal atqarady, alaıda, jalaqysy da, áleýmettik jarnasy da ýaqytynda aýdarylmaıdy. Bulaı bolmaıdy. Sondyqtan, bul máseleni baqylaýda ustaý qajet», -dedi Serik Shápkenov.
Eske sala ketelik, budan buryn Atyraýda jumyspen qamtý ortalyǵyna júgingen 28 myń adamnyń 40% ǵana jumysqa ornalasqanyn jazǵan edik.
Foto: businesswire.com
