Teńiz ken ornynda 4 balanyń anasy ólim aýzynan qutqaryldy
ATYRAÝ. QazAqparat - Teńiz ken ornynda ólim aýzynda jatqan áıel qutqaryldy, dep xabarlaıdy QazAqparat tilshisi.
«Jylyoı aýdandyq aýrýxanasyna «Teńizshevroıl» JShS klınıkasynyń reanımatolog-dárigerimen birge 39 jastaǵy áıel es-tússiz kúıde jetkizildi. Ol Teńiz munaı-gaz ken ornynda merdiger munaı kompanııalarynyń birinde jumys isteıdi. Tórt balanyń anasy munyń aldynda densaýlyǵyna eshqandaı shaǵym aıtpaǵan. Tańǵy saǵat 4-terde jaǵdaıy nasharlaǵan. Ol aýrýhanaǵa aýyr xalde túsken, kóp qan joǵaltqan. Jylyoılyq dárigerler «Jatyrdan tys júktilik, qursaq qýysyna qan ketý, gemorragııalyq shok, 1-deńgeıli koma» dıagnozyn qoıyp, shuǵyl operatsııa jasady jáne qan quıdy», - dep xabarlady Atyraý oblystyq densaýlyq saqtaý basqarmasynyń baspasóz xatshysy Amanjol Saǵynǵalıev.
Qazir áıeldiń jaǵdaıy turaqty, ómirine eshqandaı qaýip tónip turǵan joq.
Avtor: A. Sokolov
