Teńiz ken ornynda 30-dan astam jumysshy tamaqtan ýlanyp qaldy
Teńiz ken orny Jylyoı aýdanynyń ortalyǵy – Qulsary qalasynan 100 shaqyrymnan astam qashyqta ornalasqan. Ken ornyndaǵy ınvestıtsııalyq jobalardy iske asyrýǵa birneshe otandyq jáne sheteldik kompanııa merdigerlikke tartylǵan.
Sonyń biri – otandyq ISKER JShS. Atalǵan kompanııanyń 30-dan astam jumysshysy vahtalyq kenttegi ashanadan túski as ishken soń ýlanyp qalǵan.
Tamaq ishkennen keıin ózderin jaısyz sezingen jumysshylar dárigerlik kómekke júgingen. Olarǵa «ortasha aýyrlyqtaǵy dıareıa» dıagnozy qoıyldy.
Teńiz ken ornyndaǵy medıtsınalyq klınıkada tamaqtan ýlanǵan jumysshylarǵa alǵashqy kómek kórsetilgen. Sodan soń olardyń bir toby klınıkaǵa jatqyzylǵan.
Jeńil dárejede zardap shekken jumysshylardyń keıbiri jataqhanaǵa jiberilgen.
«Teńizshevroıl» JShS-niń baspasóz qyzmeti atalǵan oqıǵaǵa baılanysty aqparatty keıin berýge ýáde etti.
Eske salaıyq, budan buryn Teńiz ken ornynda jarylys bolyp, eki adam qaza tapqan edi.
Keıin Teńiz ken ornyndaǵy jarylys qubyrdyń flanetsti qosylysynyń úzilýinen bolǵany anyqtaldy.