Teńiz ken ornynda 26 jumysshy tamaqtan ýlandy
ATYRAÝ. QazAqparat - Teńiz ken ornynda 26 jumysshy ýlanyp qaldy, dep habarlaıdy QazAqparat tilshisi.
Keshe Bolashaq kentindegi ashanalardyń birinde keshki astan keıin jappaı ýlaný deregi tirkeldi. 21 adam Qulsary qalasyndaǵy ortalyq aýdandyq aýrýhanaǵa jetkizilgen. Búgin zardap shekkender sany 26 adamǵa jetti.
«Tótenshe jaǵdaı bolǵan «Montajarnaıyqurylys» AQ barlyq qyzmetkerleri tamaqtan ýlaný kúdigimen aýrýhanaǵa jatqyzyldy. Jergilikti dárigerlerge kómektesý úshin Atyraý oblystyq qoǵamdyq densaýlyqty saqtaý departamentiniń mamandary da aýdandyq aýrýhanaǵa jiberildi. Aldyn ala dıagnoz - gastroenterokolıt. Naýqastardyń jaǵdaıy ortasha», - dep málimdedi Atyraý oblystyq memlekettik eńbek ınspektsııasy basqarmasynyń basshysy Igilik Áýbákirov.
