Teńiz ken ornynan kelgen turǵynnan koronavırýs anyqtaldy - BQO
ORAL. QazAqparat – Batys Qazaqstan oblysynda koronavırýs juqtyrǵan sońǵy úsh naýqastyń bireýi Teńiz ken ornynan kelgen, dep habarlaıdy QazAqparat tilshisi.
BQO ákimdiginen alynǵan málimetke qaraǵanda, ol – 1988 jylǵy oblys turǵyny.
Kórshi aımaqtan kelýine baılanysty karantındik statsıonarǵa jatqyzylyp, zerthanalyq synama alynǵan.
Úsh adamnyń ekeýi – Túrkistan oblysynyń Reseıde jumys jasaıtyn 1980 jáne 1970 jylǵy turǵyndary. Olar Samara oblysymen shektesetin «Syrym» avtoótkelinen ótken kezde densaýlyqtaryna shaǵymy bolmaǵanmen, algorıtmge sáıkes jedel járdemmen karantındik statsıonarǵa jetkizilgen.
PTR dıagnostıkalyq zertteý qorytyndysymen úsheýiniń de koronavırýs juqtyrǵany belgili bolyp, oblystyq juqpaly aýrýlar aýrýhanasyna ornalastyryldy.
Naýqastarmen qarym-qatynasta bolǵandar baqylaýǵa alynyp, aýrý oshaqtarynda dezınfektsııalyq jumystar júrgizildi.
Osylaısha BQO-da syrqattanǵandar sany 213-ke jetip, sonyń 59-y saýyǵyp shyqty.
Eske sala keteıik, budan buryn BQO-da aýrý juqtyrǵan bes adamnyń Teńiz ken ornynan kelgenin, bir kúnde 18 adamnyń jazylyp shyqqanyn jazǵan bolatynbyz.
Sondaı-aq, Teńiz kenishinde karantındik rejım engizildi.
