Teńiz ken ornynan 7 jylda 700 myń tonna qaldyq qaıta óńdeýge jiberilgen
Atyraý oblystyq ekologııa departamentiniń basshysy Álibek Bekmuhametovtiń aıtýynsha, Jylyoı aýdanyndaǵy Teńiz ken ornynda qaldyqtardy óńdeý qolǵa alynǵan. Aldaǵy ýaqytta qaldyqtardy óńdeıtin ozyq tehnologııalardy engizý qajet.
«Teńizshevroıl» JShS bas dırektorynyń orynbasary Kóńilqosh Súıesinovtiń málimetine súıensek, Teńiz ken ornynda jumysshylar turatyn 100-ge jýyq vahtalyq qalashyq pen óndiristik keshen ornalasqan. Ken ornyndaǵy óndiristik qyzmet pen ilespe ınfraqurylymdardan qaldyqtardyń 63 túri jınaqtalady.
«Qaldyqtardyń 35-ten astam túri óńdeýge jiberiledi. Máselen, 2015 jyldan beri óńdeý úshin jóneltilgen qaldyqtardyń kólemi 700 myń tonnadan asty. Qaldyqtardy qaıta óńdeýge basa kóńil bólinip otyr. 2016-2022 jyldary aralyǵynda 2 259 tonna plastıkalyq bótelke qaıta óńdeýge jiberildi. Onyń ishinde plastıkalyq jáne PET túıirshikteri bar basqa da qaldyqtar bar. Al, 5 861 tonna qaǵaz ben karton, býyp-túıý materıaldary men basqa da taýarlar óndiriske jiberildi. Al 99 542 tonna beton qaldyǵy qurylys materıaly retinde paıdalanyldy», -deıdi Kóńilqosh Súıesinov.
Onyń deregine qaraǵanda, 2019 jyly plastıkalyq bótelkelerdi suryptaý 11 esege ósip, 700 tonnadan asqan. Al, kartondy qaıta óńdeý 8 ese artyp, 1500 tonnany quraǵan.
«Teńiz ken ornynyń óndiristik, ákimshilik ýchaskelerinen shyǵarylǵan qaldyqtar «TengızEkoTsentr» nysanyna tasymaldanady. Jalpy aýmaǵy 100 gektardy quraıtyn bul nysan 2004 jyly paıdalanýǵa berildi. Munda aǵash qaldyqtaryn usaqtaıtyn Tana, tas untaqtaıtyn Parker, qaldyqtardy tyǵyzdaıtyn BOMAG, Caterpillar, medıtsınalyq qaldyqtardy óńdeıtin Newster, qaǵazdy usaqtaıtyn Itimuse, sondaı-aq, WHS jartylaı avtomatty syǵymdaý qondyrǵylary ornatylǵan.
Eske sala ketelik, buǵan deıin majar ınvestory Atyraýda kúnnen energııa alý jobasyn usynǵanyn jazǵan edik.
