Teńiz ken orny jumyskerleriniń 95 paıyzy - qazaqstandyqtar

ALMATY. QazAqparat – Atyraý oblysynyń Teńiz ken ornynda munaı óndirýmen aınalysatyn «Teńizshevroıl» JShS-de qazaqstandyq qyzmetkerlerdiń shtattyq úlesi 94,8 paıyzǵa jetti. Bul týraly BAQ ókilderimen kezdesý barysynda seriktestiktiń bas dırektory Kevın Laıon aıtty, dep habarlaıdy QazAqparat tilshisi.

Kevın Laıonnyń sózinshe, joǵary jáne orta býyndaǵy qazaqstandyq basshylardyń úlesi - 86,7 paıyz.

«Negizgi óndiris pen keleshek keńeıý jobasy - Uńǵy erneýindegi qysymdy basqarý jobasynda jumys isteıtin isteıtin qazaqstandyq qyzmetkerlerdiń úlesi - 94,8 paıyz. 1993 jyly bul kórsetkish 50 paıyz edi. Joǵary jáne orta býyndaǵy qazaqstandyq basshylardyń úlesi basshylyq quramnyń jalpy sanynyń 86,7 paıyzyn quraıdy. Kadrlardy oqytý jáne shyńdaý turaqty baǵdarlamasy nátıjesinde anaǵurlym jaýapty laýazymdarǵa qyzmetkerler kóptep tartylyp jatyr»,- deıdi ol.

Sonymen qatar, ol 2016 jyly qolǵa alynǵan jobalardyń aıaqtalýyna baılanysty byltyr 20 myńǵa jýyq jumysshy jumystan bosatylǵanyn aıtty.

«Bizde jobany júzege asyrýǵa birqatar merdiger kompanııa tartylǵan bolatyn. Sonyń aıasynda olar qurylys jumysyna adamdardy ýaqytsha qabyldady. Ózderińiz bilesizder, joba kezeń-kezeńimen júzege asady. Ol aıaqtalǵanan keıin jumysshylar bosatylady. Byltyr 20 myńnan astam adam jumystan ketti. Bıyl da sonsha jumysshy bosatylady. Biraq munyń joǵaryda aıtqan kompanııa jumysshylaryna qatysy joq»,- dep túsindirdi ol.

Aıtýynsha, 1993 jyly negizi qalanǵan ken orny Atyraý oblysynyń turǵyndary men qyzmetkerlerin qamtıtyn áleýmettik jobalar men baǵdarlamalardy qarjylandyrýǵa 2,7 mlrd AQSh dollaryn jumsady.

«Jyldyq bıýdjeti 25 mln AQSh dollaryna teń «Igilik» áleýmettik ınfraqurylym boıynsha erikti baǵdarlamasy men jylyna 2,5 mln dollar bólinetin áleýmettik ınvestıtsııa baǵdarlamasy arqyly jergilikti turǵyndardy ári qaraı da qoldaı bermek»,- dedi spıker.

Foto: tengizchevroil.com