Teńiz kemelerine qatysty tirkeý sharalary ońtaılandyryldy

NUR-SULTAN. QazAqparat - Teńiz kemeleriniń nemese qurastyrylyp jatqan kemelerdiń ıpotekasyn tirkeý boıynsha memlekettik qyzmet elektrondyq formatqa aýystyrý arqyly ońtaılandyryldy, dep habarlaıdy QazAqparat.

«Osy qyzmetti kórsetýdiń tıisti standarty aǵymdaǵy jyldyń 19 qyrkúıeginen bastap qoldanysqa engizildi. Endi qyzmet alýshylarǵa Aqtaý qalasynda ornalasqan atalǵan ákimshiliktiń keńsesine nemese halyqqa qyzmet kórsetý ortalyǵyna barýdyń qajeti joq. Ótinish berýshige elektrondyq-tsıfrlyq qoltańba jáne ınternetke qol jetkizýń jetkilikti», - dep atap ótilgen QR IIDM Kólik komıtetiniń málimetinde.

Osy oraıda «elektrondyq úkimet» portalynda málimetter toltyrylyp, tólem shlıýzi arqyly memlekettik baj tólenedi (5 aılyq eseptik kórsetkish nemese 12 625 teńge). Sonymen qatar, osyndaı shartta kórsetilgen qujattarmen keme ıpotekasy týraly sharttyń skanerlengen kóshirmesi tirkeledi. Qyzmet bir jumys kúni ishinde kórsetiledi.

Qujattardy qaraý nátıjeleri boıynsha keme ıpotekasyn tirkeý týraly kýálik ótinish berýshiniń «jeke kabınetine» avtomatty túrde jiberiledi.