Teńiz, Qashaǵan, Qarashyǵanaqtaǵy taýarlardyń jergilikti úlesi 5 paıyzǵa da jetpeıdi

ASTANA. QazAqparat - Memleket basshysy kásipkerlermen kezdesýde munaı-gaz salasyn damytý josparyn bólisti, dep habarlaıdy QazAqparat Aqordaǵa silteme jasap.

«Munaı servısi salasy otandyq ekonomıkany ártaraptandyrýdyń jáne ósimdi qamtamasyz etýdiń negizgi tetigi bolýy kerek. Qazir Teńiz, Qashaǵan jáne Qarashyǵanaq ken oryndaryndaǵy jobalardy jobalaýmen (ınjınırıng) basqa memleketter aınalysyp jatyr. Bul Teńiz ken ornyn keleshek keńeıtý jobasyna da qatysty. Jobalyq sheshimderde ımporttyq materıaldar men qurylǵylar esepke alynatyny túsinikti. Bul otandyq óndirýshilerdiń munaı-gaz salasyndaǵy jobalardy júzege asyrý múmkindikterin shekteıdi», - dep atap ótti Qasym-Jomart Toqaev.

Onyń aıtýynsha, iri jobalardaǵy (Teńiz, Qashaǵan, Qarashyǵanaq) taýarlardyń jergilikti úlesi 5 paıyzǵa da jetpeıdi.

Úkimet jergilikti ınjenerler men kompanııalardy mindetti túrde tarta otyryp, jobalyq dızaın-keńselerdi Qazaqstanǵa kóshirýge yqpal etýge tıis.

«Bul rette sheteldik seriktester aldyndaǵy kelisimsharttyq mindettemelerdi buzý týraly áńgime bolmaýǵa tıis ekenin arnaıy atap ótkim keledi. Biz iri sheteldik kompanııalarmen buǵan deıin jumys istep keldik jáne aldaǵy ýaqytta da jumys isteı beremiz. Shyn máninde, bul – bizdiń uzaqmerzimdi strategııamyz. Sonymen qatar bizdiń de talaptarymyzdyń eskerilgenin qalaımyz. Otandyq munaı servısi kompanııalaryna qarjylaı qoldaý kórsetý máselesin sheshý kerek. Munaı-gaz korporatsııalarymen qol qoıylǵan kelisimshartty kepil retinde qarastyra otyryp, qazaqstandyq kompanııalardy bank arqyly qarjylandyrý boıynsha naqty sharalar qabyldaý kerek. Qarjy salasyn retteýshi organdar bul másele boıynsha sheshim qabyldaýy qajet. Teńiz ken ornyn bolashaq keńeıtý jobasynyń aıaqtalýyna baılanysty munaı servısi salasynda ondaǵan myń adam jumystan bosatylady. Otandyq mamandardy Qatar jáne Saýd Arabııasy sııaqty elderde jumysqa ornalastyrýǵa bolady», - dep túıindedi Prezıdent.