Tengri Travelsystem týrfırmasynan zardap shekken barlyq týrıster 19 maýsymǵa deıin elge jetkiziledi
ASTANA. QazAqparat - 19 maýsymǵa deıin Tengri Travelsystem týrıstik kompanııasynyń qyzmetin toqtatýynan zardap shekken týrısterdiń barlyǵy Túrkııadan Qazaqstanǵa jetkiziledi.
Bul týraly búgin ótken brıfıngte Azamattyq avıatsııa komıteti tóraǵasynyń orynbasary Talǵat Lastaev aıtty.
«Azamattyq avıatsııa komıteti «Eır Astanamen» jáne basqa da áýe kompanııalarymen barlyq jumystardy atqarýǵa kirisip ketti. Biz úshin eń basty mindet -Túrkııada qalǵan azamattarymyzdy alyp kelý. Barlyq jolaýshylar eshbir qosymsha tólemsiz ákelinedi. 19 maýsymǵa deıin «Eır Astana» kompanııasynyń uıymdastyrýymen Almaty-Antalııa jáne Astana-Antalııa reısteri toqtaýsyz jumys isteıtin bolady. Shamamen 13 reıs josparlanyp otyr», - dedi ol.
Aıta keteıik, búgin túnde TengriTravelsystem týrfırmasy óz saıtyna jumysyn toqtatatyny týraly jazǵan bolatyn. QR Investıtsııalar jáne damý mınıstrliginiń málimeti boıynsha, 600 ben 1000-ǵa jýyq aralyqtaǵy otandyq týrısterdi Túrkııada ornalasqan qonaqúılerinen shyǵaryp jiberýi múmkin.
