Tengri Travelsystem basshysyna qatysty qylmystyq isti tergeý bastaldy
ASTANA. QazAqparat - Tengri Travelsystem týrıstik fırmasynyń basshysy Roman Hvanǵa qatysty «Alaıaqtyq» baby boıynsha qylmystyq isti tergeý amaldary bastaldy. Bul týraly QazAqparat tilshisine Investıtsııalar jáne damý mınıstrliginiń Týrızm ındýstrııasy departamentiniń dırektory Tımýr Dúısenǵalıev habarlady.
«Eki kún buryn Tengri Travelsystem týroperatorynyń basshysyna qatysty «Alaıaqtyq» babymen tergeý amaldary bastalyp ketti. Ázirge qandaı da bir protsessýaldyq áreketter boıynsha aqparat joq», - dedi T.Dúısenǵalıev.
Sondaı-aq ol qazirgi kezde shetelde júrgen týrıster týraly habarlady.
«Búginde elden eshkim shyǵarylǵan joq. Bizdegi málimetter boıynsha, Túrkııada taǵy 500-den astam adam bolsa, Chehııada 41 azamatymyz júr. Travelsystem - bas quryltaıshysy Hvan myrza bolyp tabylatyn Travelsystem-niń enshiles kompanııasy. Osy jerde qıyndyqtar týyndady, sebebi ol chehııalyq áýe jelileriniń resmı ókili bolǵan, olarmen baılanysyp, bizdiń azamattarymyzdy elge shaqyrtý úshin ýaqyt qajet boldy. Qazirgi kezde problemalar joq, Elshilikpen únemi baılanystamyz», - dep atap ótti Tımýr Dúısenǵalıev.
Esterińizge sala keteıik, 3 maýsym kúni Tengri Travelsystem kompanııasy óz qyzmetiniń toqtatylǵany týraly habarlady.
