«Tengri Travel system» týrıstik kompanııasynyń bankrotqa ushyraýyna baılanysty qazaqstandyqtar Túrkııa qonaq úılerinen qýyla bastady
ALMATY. QazAqparat - Qazaqstandyq «Tengri Travel system» týrıstik kompanııasy bankrotqa ushyraýyna baılanysty qazaqstandyqtar Túrkııanyń qonaq úılerinen qýyla bastady. Bul týraly Qazaqstan Týrıstik agenttikter qaýymdastyǵy Feısbýktegi paraqshasynda málimdedi.
Qonaq úı basshylary qazaqstandyqtarǵa turý aqysyn qaıta tóleýge májbúrlep jatyr. Qaýymdastyq ókili Denıs Krıvosheevtiń habarlaýynsha, qıyn jaǵdaıda qalǵan demalýshylardyń sany - 700.
«80-ge jýyq adamnyń qaıta ushyp kelýi qıyndady. Olar «Scat» áýe kompanııasymen ushý kerek bolatyn. Erteń, juma kúnderi ushýy tıis demalýshylar da ekiudaı jaǵdaıda. Mazalaıtyn másele kóp. Osy baǵytta jumys jasap jatyrmyz», - dedi Denıs Krıvosheev.
Onyń aıtýynsha, kompanııa basshylyǵy qazir Eýropaǵa attanyp ketti.
Qazaqstan Týrıstik agenttikter qaýymdastyǵy japa shekken agenttikterge kómek qolyn sozý úshin úılestirý shtabyn qurdy.
Olar memlekettik organdar men áýe kompanııalary, qabyldaýshy kompanııalar, saqtandyrýshy kompanııalar, zańgerler men týroperatorlar arasynda aqparattyq almasýdy jeńildetpek. Atalǵan derekke baılanysty Qazaqstan Týrıstik agenttikter qaýymdastyǵy Almatyda saǵat 15:00-de baspasóz konferentsııasyn ótkizbek.
