Teńgeniń nyǵaıýy ınflıatsııanyń baıaýlaýyna yqpal etti — Ulttyq bank
ASTANA. KAZINFORM- Qazaqstan Ulttyq bankiniń tóraǵasy Tımýr Súleımenov jyldyq ınflıatsııanyń toǵyz aı qatarynan baıaýlaýyna áser etken negizgi sebepterdi atady.
Onyń aıtýynsha, maýsymda jyldyq ınflıatsııa 10,3%-dy qurady. Mamyrda bul kórsetkish 10,4% bolǵan. Osylaısha, baǵanyń ósý qarqyny toǵyz aı qatarynan tómendep keledi.
Maýsymdaǵy aılyq ınflıatsııa 0,8% boldy. Al maýsymdyq faktorlardy esepke alǵandaǵy bazalyq ınflıatsııa 0,9%-dy qurady.
Ulttyq banktiń málimetinshe, ınflıatsııanyń baıaýlaýyna aqsha-kredıt saıasaty, teńgeniń nyǵaıýy, halyq suranysynyń turaqtanýy jáne Úkimet pen Ulttyq banktiń ınflıatsııaǵa qarsy sharalary áser etken.
— Maýsymda azyq-túlik ınflıatsııasy 10,4%-ǵa deıin tómendedi. Al azyq-túlikke jatpaıtyn taýarlar baǵasynyń ósimi qatarynan úsh aı boıy ózgergen joq. Buǵan BJZQ-daǵy jınaqty jetkiliktilik shegi kóterilmeı turyp sheship alýǵa baılanysty ýaqytsha suranys áser etken bolýy múmkin. Al teńgeniń nyǵaıýy ımporttyq taýarlardyń baǵasyn tejeýge yqpal etip otyr, — dedi Tımýr Súleımenov.
Onyń sózinshe, ınflıatsııa baıaýlaǵanymen, bul úrdistiń turaqty bolatynyn aldaǵy aılarda ǵana baǵalaýǵa bolady.
Eske salaıyq, buǵan deıin Ulttyq bank bazalyq mólsherlemeni jyldyq 16,75%-ǵa deıin tómendetken bolatyn.
