Teńgeniń nyǵaıýy BJZQ ınvestıtsııalyq tabysynyń ýaqytsha tómendeýine áser etti - Ulttyq bank
ASTANA. KAZINFORM- Biryńǵaı jınaqtaýshy zeınetaqy qorynyń (BJZQ) ınvestıtsııalyq tabysy ulttyq valıýtanyń kúsheıýi aıasynda 240 mlrd teńgege tómendedi. Degenmen Qazaqstan Ulttyq banki bul jaǵdaı qazaqstandyqtardyń zeınetaqy aktıvteriniń uzaq merzimdi tabystylyǵyna áser etpeıdi.
Ulttyq bank tóraǵasynyń orynbasary Álııa Moldabekovanyń aıtýynsha, ınvestıtsııalyq tabystyń qaıta baǵalanýy teńge baǵamynyń ózgerýine baılanysty boldy. Bul óz kezeginde zeınetaqy aktıvterindegi qarjy quraldarynyń naryqtyq qunyna áser etken.
- Munda eshqandaı shyǵyn týraly sóz bolyp otyrǵan joq. Áńgime teńgeniń nyǵaıýy aıasynda ınvestıtsııalyq tabystyń tómendeýi jaıynda. Investıtsııalyq aktıvterdiń belgili bir bóligi – shamamen 40%-y – ártaraptandyrý maqsatynda shetel valıýtasyna salynǵan. Jyl basynan, ıaǵnı qańtardan naýryz aıynyń sońyna deıin teńge dollarǵa shaqqanda shamamen 5,5%-ǵa nyǵaıdy. Sonyń saldarynan BJZQ-nyń ınvestıtsııalyq tabysy azaıdy. Naqty aıtqanda, naýryz aıynda ınvestıtsııalyq tabys 240 mlrd teńgege tómendedi, - dedi ol.
Jalpy alǵanda, 2026 jyldyń basynan beri BJZQ 172 mlrd teńge kóleminde oń tabys kórsetken. Sonymen qatar onyń aıtýynsha, zeınetaqy aktıvteriniń tabystylyǵyn qysqa merzimde baǵalaýǵa bolmaıdy, óıtkeni olar uzaq merzimdi jınaqtarǵa jatady. Osyǵan baılanysty Ulttyq bank azamattardy uzaq merzimdi tabystylyqqa nazar aýdarýǵa shaqyrady.
- BJZQ turaqty túrde tabys alyp otyrady. Bul tabys kýpondyq tólemderden, dıvıdendterden jáne naryqtyq qunnyń ósýinen quralady. Biz aıtyp otyrǵan jaǵdaı – teńgeniń nyǵaıýy nátıjesinde dollar baǵamynyń tómendeýi ǵana. Zeınetaqy aktıvteri teńgemen de, dollarmen de ınvestıtsııalanǵandyqtan, bir bóligi ósse, ekinshi bóligi tómendeýi múmkin. Biraq mundaı ózgeristerdi qysqa merzimde baǵalaý durys emes, -dep túsindirdi Moldabekova.
Eske sala keteıik, BJZQ jınaǵynyń jetkilikti shegi qanshaǵa kóteriletini kelesi aıda belgili bolady.
