Teńgeniń nyǵaıýy bıýdjet kirisin azaıtty — Mınıstrlik naqty sandardy atady
ASTANA. KAZINFORM — Úkimet 2027-2029 jyldarǵa arnalǵan respýblıkalyq bıýdjet jobasyn tanystyrdy. Ulttyq ekonomıkalar mınıstrliginiń birinshi vıtse-mınıstri Azamat Ámrın 2027 jylǵa arnalǵan kiris boljamy buǵan deıingi úsh jyldyq bıýdjetpen salystyrǵanda birden 1,3 trln teńgege tómendegenin túsindirdi.
Onyń aıtýynsha, 2027 jylǵa arnalǵan bıýdjet kirisi boljamynyń tómendeýine birneshe faktor áser etken. Birinshi kezekte, 2026 jylǵy munaı óndirý kólemine qatysty boljam qaıta qaralǵan. Buǵan Kaspıı qubyr konsortsıýmy aýmaǵynda bolǵan dron shabýyldarynan keıingi jaǵdaı sebep bolǵan.
— Ótken jyly bıylǵy jylǵa munaı óndirý kólemin 100,5 mln tonna dep josparlaǵan edik. Qazir geosaıası jaǵdaıdy eskere otyryp, bıyl qańtar, aqpan jáne shilde aılarynda birqatar másele bolǵanyn bilesizder. Soǵan baılanysty munaı óndirý kólemi 96 mln tonnaǵa deıin tómendedi, — dedi Azamat Ámrın.
Munaı óndirý kóleminiń azaıýy eksporttyq túsimderge de áser etken.
— Munyń tikeleı áseri — eksporttyq kedendik baj jáne munaı eksporty kóleminiń azaıýynan shamamen 200 mlrd teńge kem túsedi. Janama áseri de bar, ásirese batys óńirlerde munaı óndirý kólemi azaıǵanda oǵan qyzmet kórsetetin servıstik kompanııalardyń túsimi de tómendeıdi. Úshinshi áser — osy salada jumys isteıtin adamdardyń tabysy men tutyný shyǵyndaryna baılanysty. Osy faktorlardyń barlyǵyn qosqanda, munaı óndirý kóleminiń azaıýyna baılanysty ekonomıkadaǵy aqsha kólemi 1,7 trln teńgege qysqarady. Soǵan sáıkes, osy somaǵa túsetin salyq kólemi de azaıady, — dep túsindirdi vıtse-mınıstr.
Budan bólek, teńgeniń dollarǵa shaqqandaǵy baǵamynyń nyǵaıýy ımportqa salynatyn QQS túsiminiń tómendeýine áser etken.
— Ótken jyly dollar baǵamyn 540 teńge dep alǵan edik. Búgingi baǵam menińshe, 447 teńge shamasynda. Baǵamnyń ózgerýi de aıtarlyqtaı áser etedi. Tek ımportqa salynatyn QQS boıynsha 90 teńgeden asatyn aıyrmashylyqtyń ózi bıýdjetke túsetin túsimniń 700 mlrd teńgeden astamyn azaıtady. Sebebi ımporttalatyn taýarlardyń teńgedegi quny tómendeıdi. Dollarmen eseptegende olardyń baǵasy burynǵydaı bolǵanymen, teńgege shaqqanda taýar quny arzandaıdy, — dedi Azamat Ámrın.
Buǵan deıin Qarjy vıtse-mınıstri Abzal Beısenbekuly memlekettik organdar suraǵan qarjynyń 5 trln teńgesi negizsiz bop shyqqanyn aıtqan edi.
Sondaı-aq Ulttyq qordan strategııalyq jobalarǵa 5 trln teńge bólinedi.
