Teńgeniń nyǵaıýy azyq-túlik baǵasyn tómendetýge áser ete me
ASTANA. KAZINFORM – Aýyl sharýashylyǵy mınıstrligi ulttyq valıýtanyń nyǵaıýy azyq-túlik baǵasyna áser etýi múmkindigine qatysty pikir bildirdi.
Vıtse-mınıstr Azat Sultanovtyń aıtýynsha, keıingi kezde birqatar pozıtsııa boıynsha baǵanyń ósýi tirkeldi.
— Kúnbaǵys maıy men kókónisterge, ıaǵnı kartoptyń, sábizdiń jáne pııazdyń qymbattaýy baıqaldy. Biraq bul ósim 1%-ǵa deıingi aralyqta boldy jáne muny maýsymdyq sıpatpen baılanystyramyz, - dedi A. Sultanov Parlament Májilisinde tilshiler suraǵyna jaýap bere otyryp.
Sondaı-aq ol teńgeniń nyǵaıýy azyq-túlik baǵasyna uzaq merzimdi áser etpeıtinin aıtty.
- Import týraly aıtatyn bolsaq, olar tsıkldik sıpatta bolady. Dollar baǵamy álsiregen kezde, olar eski baǵammen jetkizilgen, ıaǵnı burynǵy qaldyqtardy satýy múmkin. Baǵaǵa satyp alý jáne saqtaý shyǵyndary kiredi. Valıýta naryǵyndaǵy qysqa merzimdi ózgerister ımporttyq taýarlardyń qunyn tómendetýde eleýli áser etpeıdi, - dedi Sultanov.
Búgin Qazaqstan qor bırjasyndaǵy (KASE) saýda-sattyq qorytyndysy boıynsha dollar baǵamy arzandady.
Aıta keteıik, jaqynda Premer-mınıstrdiń orynbasary — ulttyq ekonomıka mınıstri Serik Jumanǵarınniń tóraǵalyǵymen ótken ınflıatsııany turaqtandyrý jónindegi kezekti keńeste birinshi toqsannyń aldyn ala qorytyndylary qaraldy.
