Ulttyq bank Ulttyq qordan 500 mln dollarǵa deıin shetel valıýtasyn satýdy josparlap otyr
ASTANA. KAZINFORM — Qarasha aıynyń qorytyndysy boıynsha teńge baǵamy bir AQSh dollary úshin 512,57 teńgege deıin 3,3%-ǵa nyǵaıdy. Bul týraly Ulttyq bank habarlady.
Qazaqstan qor bırjasyndaǵy saýda-sattyqtyń ortasha kúndik kólemi bir aıda 271 mln AQSh dollarynan 280 mln AQSh dollaryna deıin ulǵaıdy. Saýda-sattyqtyń jalpy kólemi 5,6 mlrd AQSh dollar boldy.
Qarasha aıynda Ulttyq qordan 600 mln AQSh dollaryna valıýta satyldy, bul respýblıkalyq bıýdjetke transfertter bólýdi qamtamasyz etýge múmkindik berdi. Ulttyq qordan satý úlesi jalpy saýda-sattyq kóleminiń 10,7%-yn nemese kúnine shamamen 30 mln AQSh dollar boldy.
— Kútiletin fıskaldyq túsimderdi eskere otyryp, Úkimettiń aldyn ala boljamdy ótinimderine qaraı Ulttyq bank jeltoqsanda respýblıkalyq bıýdjetke transfertter bólýge Ulttyq qordan 400 mln AQSh dollarynan 500 mln AQSh dollaryna deıingi mólsherde valıýta satylady dep kútedi. Aınalý operatsııalary aıasynda qarashada 475 mlrd teńge alyndy. Jeltoqsanda osy maqsatta 475 mlrd teńge valıýta satý josparda bar, — delingen Ulttyq bank habarlamasynda.
Ulttyq qor qarajatymen operatsııalar júrgizý kezinde, sondaı-aq teńestirý tetigin iske asyrý kezinde Ulttyq Bank naryqtyq beıtaraptyq qaǵıdatyn saqtaıdy, bul shetel valıýtasyn turaqty jáne birkelki satýdy bildiredi.
Ulttyq bank qarashada valıýtalyq ınterventsııalar júrgizgen joq.
Ótken aıdyń qorytyndysy boıynsha kvazımemlekettik sektor sýbektileriniń valıýtalyq túsiminiń bir bóligin mindetti satý normasy sheńberinde valıýtalyq túsimdi satý kólemi shamamen 390 mln AQSh dollar boldy.
BJZQ valıýtalyq aktıvteriniń úlesi osyǵan deıingi josparǵa sáıkes 40% astam ekenin eskere otyryp, Ulttyq bank qarashada zeınetaqy aktıvteriniń ınvestıtsııalyq portfeline AQSh dollaryn satyp alǵan joq. Jeltoqsanda da valıýtany satyp alý josparlanbaıdy.
— Transparenttilik qaǵıdaty sheńberinde Ulttyq bank valıýta naryǵynda júrgiziletin operatsııalar týraly tolyq aqparatty ashyp kórsetýdi jalǵastyrady. Qysqa merzimdi perspektıvada teńgeniń dınamıkasy naryqqa qatysýshylardyń kútýlerine, toqsandyq salyq tólemderine, álemdik naryqtardaǵy ahýalǵa jáne geosaıası jaǵdaıdyń ózgerýine baılanysty bolady. Ulttyq bank teńgerimsizdiktiń jınaqtalýyna jol bermeıtin jáne altyn-valıýta rezervteriniń saqtalýyn qamtamasyz etetin qolaıly baǵam belgileý rejımin ustanýdy jalǵastyrady, — delingen habarlamada.
Aıta ketelik Astana men Almatyda dollar 515-518 teńgeden saýdalanyp jatyr.