Teńgeniń dızaıny nelikten ózgertildi - Ulttyq bank jaýaby
ASTANA. KAZINFORM — Ulttyq bank tóraǵasy Tımýr Súleımenov ulttyq valıýtanyń dızaıny nege ózgerip jatqanyn túsindirdi.
- Táýelsizdik jyldarynda ulttyq valıýtanyń engizilgenine 32 jyl boldy. Osy ýaqytta úsh ret ózgerdi. Bastapqyda alǵashqy teńge shyqty, sodan keıin 10-shy jyldary ózgeris bolsa, endi 20-shy jyldary osyndaı bastama júzege asyp jatyr. Meniń oıymsha, «teńgeniń dızaınyn jıi ózgerip jatyr» dep aıtý - qısynsyz. Bul jaǵdaıǵa ártúli qyrynan qaraýǵa bolady. Bireýler dollardyń dızaıny ózrgerissiz basylyp jatqanyn alǵa tartýy múmkin. Degenmen, ár elde óziniń tańdaýy bar, - dedi T. Súleımenov Ulttyq bankte ótken baspasóz máslıhatynda.
Onyń aıtýynsha, dızaındaǵy ózgeris jalǵan aqsha basatyndarǵa tosqaýyl qoıý úshin, sondaı-aq ulttyq qolma-qol aqshany, banknottardy damytý turǵysynda kerek. Bul jumystardyń barlyǵyn Ulttyq banktiń dızaınerlik toby júzege asyrdy.
- Atap aıtqanda, buǵan qosymsha qarajat jumsalmady. Bul aqsha, kýpıýralar qalaı bolǵanda da basylyp shyǵatyn edi, ıaǵnı eski banknot qalaı basylsa, jańasy da solaı shyǵady. Eskileri kóbine jaramsyz kúıde bolǵandyqtan, sonyń bárin qabyldap, joıamyz. Sondyqtan jańa dızaınǵa qosymsha aqsha jumsaǵan joqpyz, - dedi UB basshysy.
Budan buryn habarlanǵandaı, Ulttyq bank bazalyq mólsherlemeni 18%-ǵa deıin kóterdi.
Aıta keteıik, teńgeniń tarıhy 1993 jylǵy 3 qarashadan bastaý alady. Dál osy kúni ulttyq valıýtany aınalymǵa engizý jónindegi memlekettik komıssııa qurylǵan bolatyn. 1993 jylǵy 12 qarashada «Qazaqstan Respýblıkasynyń ulttyq valıýtasyn engizý týraly» Jarlyqqa qol qoıyldy. Al 15 qarashadan bastap teńge elimizdegi jańa tólem birligine aınaldy.