Teńgeniń jańa banknotyna Ulttyq bank tóraǵasynyń qoly qaıta qoıylýy múmkin

ASTANA. QazAqparat – Endi teńge banknottary men monetalarynda Ulttyq banki tóraǵasynyń qoly men aqshany qoldan jasaǵany úshin jaýapqa tartylatyny týraly málimet ornalastyrylýy múmkin, dep habarlaıdy QazAqparat tilshisi.

«Ulttyq valıýta – Qazaqstan teńgesi banknottary men monetalary dızaınynyń tujyrymdamasyn bekitý týraly» QR Prezıdentiniń 2018 jylǵy 12 jeltoqsandaǵy № 804 Jarlyǵyna mynadaı ózgeris engizilsin:

joǵaryda atalǵan Jarlyqpen bekitilgen Ulttyq valıýta – Qazaqstan teńgesi banknottary men monetalary dızaınynyń tujyrymdamasynda:

7-tarmaq mynadaı redaktsııada jazylsyn:

«7. Mynalar:

1) serııalyq nómiri jáne dızaınynyń bekitilgen jyly;

2) banknottardyń dızaıny bekitilgen Qazaqstan Respýblıkasy Ulttyq banki tóraǵasynyń qoly;

3) banknottardy qoldan jasaý úshin jaýaptylyq týraly jazba banknottar dızaınynyń qosymsha elementteri bolyp tabylady», - delingen Ashyq NQA portalynda jarııalanǵan Prezıdettiń Jarlyq jobasynda.

Aıta keteıik, qazirgi banknottar men monetalarda bank tóraǵasynyń qoly men aqshany qoldan jasaǵany úshin jaýapkershilik qarastyrylǵany týraly málimet ornalastyrylmaıdy. Ulttyq bank málimetine saı, mundaı tájirıbe álemniń birneshe elinde bar. Bul - banknottyń túpnusqa ekenine kepildik bermek.

«Jarlyqtyń jobasynyń maqsaty - banknottardyń dızaınyn Qazaqstan Respýblıkasy Ulttyq banki tóraǵasynyń qoly túrindegi jańa elementpen tolyqtyrý. Ol tutynýshy aldynda shyǵarylǵan banknottardyń túpnusqalyǵyna kepildik berý fýnktsııasyn kúsheıtý maqsatynda engizilip otyr. Bul praktıka birqatar elderde, atap aıtqanda, Eýropa Odaǵynda, sondaı-aq Anglııada, AQSh pen Sıngapýrda qoldanylady. Sonymen qatar, banknottardyń dızaınyn jalǵan aqsha jasaý úshin jaýaptylyq týraly eskertý túrindegi jańa elementpen tolyqtyrý usynylady», - dep túsindirme berilgen Jarlyq jobasyna.

Qujat 24 shildege deıin kópshilik talqylaýda bolady. Keıin qol qoıý úshin Memleket basshysyna joldanady.

https://legalacts.egov.kz/npa/view?id=14628555