Teńgeniń serpini negizgi eksporttyq taýarymyz – munaıdyń baǵasymen aıqyndalatyn bolady
NUR-SULTAN. QazAqparat - Ulttyq bank Tóraǵasynyń orynbasary Álııa Moldabekova taıaý bolashaqta teńgeniń dınamıkasyna áser etetin negizgi faktorlar týraly aıtty, dep habarlaıdy QazAqparat tilshisi.
«AQSh kiristiliginiń ósýi jáne dollardyń nyǵaıýy aıasynda damýshy naryqtar boıynsha sentımenttiń nasharlaýy, koronavırýstyń jańa tolqyndarynyń paıda bolýy damýshy naryqtar valıýtalarynyń álsireý táýekelin arttyrdy. Bul sheteldik ınvestorlardyń teńgege jáne teńgelik aktıvterge degen qyzyǵýshylyǵynyń tómendeýine alyp keldi. Men naýryzda beırezıdentterdiń jańa ınvestıtsııalarynyń edáýir qysqarǵanyn atap ótken edim. Sáýirdiń basynan bastap jańa ınvestıtsııalar bolǵan joq, al 7-8 sáýirde Reseı rýbliniń kúrt álsireýinen keıin NDF boıynsha mólsherlemeler 9%-ǵa deıin ósti. Bul sheteldik ınvestorlardyń teńge boıynsha qysqa pozıtsııada ornalasqandyǵynyń ne teńgedegi aǵymdaǵy uzyn pozıtsııalardyń qysqarǵanynyń belgisi bolýy múmkin. Hedj-qorlardyń uzyn teńgedegi pozıtsııalardan ishinara shyǵýy baıqaldy», - deıdi Ulttyq bank Tóraǵasynyń orynbasary Álııa Moldabekova.
Alaıda, dollarǵa suranystyń artýy beırezıdentterdiń operatsııalarymen ǵana baılanysty emes.
«Biz dıvıdendterdi tóleý jáne olardy ishinara konvertatsııalaý kezeńi esebinen shetel valıýtasyna ishki suranystyń ósýin baıqap otyrmyz. Dıvıdendtik tólemderdiń joǵarǵy shegi 1-30 sáýir aralyǵyndaǵy kezeńge keledi. Sondaı-aq, shetel valıýtasyna suranystyń ósýine iskerlik belsendiliktiń qalpyna kelýi yqpal etedi, iskerlik belsendiliktiń ishki ındeksi 2020 jyldyń basynan bastap alǵash ret 50 belgisine ótti. Operatsııalyq jáne ınvestıtsııalyq qyzmet aıasynda zańdy tulǵalar ımportty qarjylandyrýǵa valıýta satyp alý kólemin ulǵaıtty. Bul bırjadaǵy saýda-sattyq kóleminiń ósýinen baıqalady», - deıdi ol.
Sondaı-aq, naryqtyq sentımenttiń qubylmalylyǵyna qaramastan, teńgeniń budan bylaıǵy serpini, eń aldymen, bizdiń negizgi eksporttyq taýarymyz – munaıdyń baǵasymen aıqyndalatyn bolady.
«Munaı naryǵyndaǵy teńgerim óte álsiz jáne kóp jaǵdaıda energııa tasymaldaýshylarǵa suranystyń ornyqty túrde qalpyna kelýine táýeldi. Óıtkeni munaı naryǵyndaǵy óndiris kólemine qatysty kelisimdermen rettelýi múmkin usynysqa qaraǵanda suranys koronavırýs jaǵdaıynyń odan ári damýyna jáne vaktsınatsııa qarqynyna tikeleı baılanysty bolyp otyr», - deıdi Álııa Moldabekova.
