Teńgeniń nyǵaıýy ekinshi deńgeıli turǵyn úı baǵasymen baılanysty - sarapshylar
ASTANA. QazAqparat - Teńge baǵamynyń nyǵaıýy ekinshi deńgeıli turǵyn úı baǵasynyń tómendeýine yqpal etedi. Bul týraly «Smart-Rıelter» elıtaly turǵyn úı agenttiginiń dırektory Inna Frolova Ortalyq kommýnıkatsııalar qyzmetiniń brıfınginde habarlady.
«Qazaqstandaǵy páterler baǵasy - ekonomıkamyzdyń deńgeıin kórsetetin basty kórsetkishterdiń biri. Daǵdarys pen dollar baǵamynyń tómendeýine qaramastan, turǵyn úı baǵasy burynǵysha, qoljetimsiz bolyp qala bermek. Páter satyp alý úshin kóp ýaqyt boıy aqsha jınaý kerek nemese ıpoteka arqyly alýǵa bolady. Sondyqtan páterdi tıimdi baǵamen satyp alý jáne oǵan artyq qarjy jumsamaý úshin baǵanyń qubylýyn baqylap otyrǵan jón. Qazan aıynda valıýta baǵamy nyǵaıyp, ekinshi deńgeıli turǵyn úı naryǵyndaǵy baǵa birshama tómendedi. Astanada teńgemen belgilengen baǵa bir jarym, eki paıyzǵa arzandap, Almatyda ol eki jarym esege, óńirlerde bir jarym esege jetti»,-dedi Inna Frolova.
Onyń sózinshe, ekinshi deńgeıli turǵyn úı naryǵyndaǵy usynystar suranystan 2-3 esege kóp. Alaıda, birinshi deńgeıdegi turǵyn úı naryǵy ekinshi deńgeıdegi naryqqa qysym kórsetip, baǵany tómendetýge ıtermeleýde. Baǵanyń tómendeýi saýdagerlerdi jalǵa berý naryǵyna tarta túsýde. Turǵyn úıdi jalǵa alý aıasyndaǵy usynystardyń artýy páterlerdiń pishini men ornalasqan jerine baılanysty ózgerip otyratyn stavkalardyń tómendeýine yqpal etti.
