Teńgeniń kúsheıýi munaı baǵasynyń qalpyna kelýine baılanysty – Álııa Moldabekova
ALMATY. QazAqparat – QR Ulttyq banki tóraǵasynyń orynbasary Álııa Moldabekova qarjy naryǵyndaǵy ahýaldy baıandap, teńgeniń kúsheıýine qatysty faktorlardy atady, dep habarlaıdy QazAqparat tilshisi.
Onyń aıtýynsha, sáýirde álemdik naryqtaǵy ahýal sońǵy 3 aıdaǵy eń táýir kórsetkishke jetken. Qor ındeksteri ósip, damýshy memleketterdiń valıýtalary turaqtalyp, shıkizat naryǵyndaǵy baǵalar túzele bastady.
«Mamyrda ekonomıkalyq belsendiliktiń artyp, karantın sharalarynyń jeńildetilýine baılanysty osyndaı dınamıka qalyptasty. Damyǵan elderdiń ortalyq bankteri qarjy aktıvterin satyp alýdy jalǵastyra bastady. AQSh Federaldy rezervi ortalyq bankterge svop jeliler arqyly dollar lıkvıdtiligin usyna bastady», - dedi Álııa Moldabekova.
Onyń aıtýynsha, naýryzdaǵy aýqymdy shoktan keıin teńgeniń kúsheıýine munaı baǵasynyń turaqtalýy yqpal etken.
«Munaı naryǵyndaǵy turaqtylyqtyń oralýy energııa tasymaldaýshy taýar baǵasyn qalpyna keltirdi. Saýd Arabııasy munaı óndirýdi taǵy da táýligine 1 mln barrelge qysqartý týraly sheshim shyǵardy. AQSh-ta burǵylaý qondyrǵylarynyń sany 222-ge jetti. Bul 10 jyldaǵy rekord azaıý kórsetkishi. Qara altyn kotırovkasy mamyrda 40%-ǵa artty», - dedi Ulttyq bank tóraǵasynyń orynbasary.
Saýda boıynsha áriptes elderdiń naryǵyndaǵy turaqtylyq nátıjesinde jáne munaı baǵasynyń turaqtalýyna baılanysty teńge 1 aıda 429,41-den 411,54-ge kúsheıdi.
Sonymen qatar, mamyrdaǵy ulttyq valıýtanyń ahýalyna ishki faktorlar yqpal etti.
Birinshiden, QR Ulttyq qorynan beriletin transfert 2,7 trln teńgeden 4,77 trln teńgege artty.
Ekinshiden, eksporterlerdiń salyq túsimderin tóleý úshin shetel valıýtasyn satýy artty.
Úshinshiden, karantınge baılanysty kóptegen kásiporyndar áli de jumys istemeı turǵandyqtan, ulttyq valıýtaǵa suranys azaıǵan.
Sondyqtan, Ulttyq bankke mamyrda ınterventsııa júrgizýdiń qajettiligi bolmady.
