Teńgeniń qunsyzdanýyna eshqandaı qaýip tónip turǵan joq - UB tóraǵasynyń orynbasary
ASTANA. 12 maýsym. QazAqparat - Teńgeniń qunsyzdanýyna qatysty eshqandaı qaýip tónip turǵan joq. Búgin QR Parlamenti Májilisi Qarjy jáne bıýdjet komıtetiniń keńeıtilgen otyrysy aıasynda jýrnalıster saýalyna jaýap bergen QR Ulttyq banki tóraǵasynyń orynbasary Bısenǵalı Tájiıaqov osylaı málim etti.
«Teńge devalvatsııasyna qatysty eshqandaı alańdaıtyn jaǵdaı joq. Reseıdegi máselege keler bolsaq, ol elde ulttyq valıýtanyń «sekiris» dálizi keń, shamamen alǵanda 25 paıyzǵa jýyqtaý. Sonyń ózinde Reseı rýbli qalypty jaǵdaıǵa kele jatyr. Osy jaǵynan alsaq ta, basqasymen salystyrsaq ta Qazaqstanǵa alańdaıtyn esh qaýip joq. Máselen, mamyr aıyndaǵy kórsetkishke kelsek, teńge aıyrbas baǵamy 0,1 paıyzdy qurady. Bul qanaǵattanarlyq kórsetkish. Jalpy alǵanda 2009 jylǵy teńgeniń qunsyzdanýynan beri bizdiń ulttyq valıýta óziniń turaqtylyǵyn saqtap otyr», - dedi UB Tóraǵasynyń orynbasary B. Tájiıaqov. Onyń aıtýynsha, teńgeniń baǵamyn ustap turý úshin elimizde altyn-valıýta qory da jetkilikti, eksporttyq áleýetimiz de ońtaıly. Ótken 4-5 aıda atalǵan eksporttyq kórsetkish 23-24 paıyzǵa artty. «Altyn-valıýtalyq rezervimiz 85 mlrd. AQSh dollarynan astam», - dedi B. Tájiıaqov.
