Teńgeniń álsireýi baǵa men tarıfterge qysym kórsetedi - Tımýr Súleımenov

ASTANA. QazAqparat - Teńgeniń álsireýi baǵa men tarıfterge qysym kórsetedi. Bul týraly búgin Úkimettiń selektorlyq rejimdegi otyrysynda 2018 jylǵy 8 aılyq ınflıatsııa jaıynda baıandaǵan Ulttyq ekonomıka mınıstri Tımýr Súleımenov aıtty, dep habarlaıdy QazAqparat tilshisi. 

«Teńgeniń álsireýi baǵa men tarıfterge qysym kórsetetinin atap ótken jón. Baǵa men ulttyq valıýtanyń arasyndaǵy joǵary korrelıatsııany eskere otyryp, aǵymdaǵy teńge baǵamynda ınflıatsııa deńgeıi 1 paıyzdyq tarmaqqa ulǵaıýy múmkin», - dedi Tımýr Súleımenov.

Onyń aıtýynsha, teńgeniń birshama álsireýin jáne ınflıatsııanyń maýsymdylyǵyn eskere otyryp, 2018 jyldyń qorytyndysy boıynsha ınflıatsııa deńgeıi baǵalaý boıynsha jańa aralyqtyń joǵary deńgeıine jaqyn bolýy múmkin. 

«Osyǵan baılanysty ákimdikterge turaqtandyrý qorlaryn toltyrý, otyn-kómir jáne dızel otynyn kedergisiz jetkizý boıynsha jumystardy qatań nazarda ustaý qajet dep esepteımiz», - dedi mınıstr. 

Tórtinshi toqsanda ınflıatsııalyq protsesterdiń kúsheıetinin nazarǵa ala otyryp, jergilikti atqarýshy organdar turaqtandyrýshy qorlaryn ýaqtyly tolyqtyrýy, baǵaǵa monıtorıng jasaı otyryp kómir men dızel otynynyń úzilissiz jetkizilimderi boıynsha jumysty kúsheıtýi qajet.